ქართული ოცნების წევრი, დიმიტრი ხუნდაძე ამბობს, რომ მიუხედავად უდიდესი გაჭირვებისა საქართველოში ბავშვები შიმშილით არ იხოცებიან და ლადო კახაძეს სრულად ეთანხმება.

"განსაკუთრებით მძიმეა ბავშვთა სიღარიბე, რომელიც დაუძლეველია. სიმართლეს თვალი უნდა გავუსწოროთ, დიახ არიან ბავშვები, რომლებიც უკიდურეს სიღარიბეში ცხოვრობენ, არიან ბავშვები, რომლებიც არასრულფასოვნად იკვებებიან და, რა თქმა უნდა, ეს მათი ჯანმრთელობისათვის არასახარბიელოა. რასაც პარტიული ტელევიზიები ყოველდღიურად აკეთებენ, თითქოს ქვეყანაში ბავშვები შიმშილის გამო ყოველდღიურად იხოცებიან, რა თქმა უნდა, ეს არის სიცრუე, ტყუილია ისიც, რომ ბავშვთა სიღარიბის დასაძლევად არაფერი კეთდება, ვიცი ამაზე ჩემზეც გაილაშქრებენ, როგორც არ აპატიეს ლადო კახაძეს, მაგრამ, სიმართლე არს ეს, რაც ბატონმა ლადომ ბრძანა. საბედნიეროდ, მიუხედავად უკიდურესი გაჭირვებისა ქვეყანაში ბავშვები შიმშილით არ იღუპებიან", — ამბობს ხუნდაძე.

11 დეკემბერს, ქართული ოცნების წევრმა, ლადო კახაძემ ჯანდაცვის მინისტრს ეკატერინე ტიკარაძეს მიმართა და ჰკითხა, არსებობს თუ არა საქართველოში შიმშილით სიკვდილის ერთი მაგალითი მაინც. ამის შესახებ მან ჯანდაცვისა და განათლების კომიტეტების ერთობლივ სხდომაზე დასვა შეკითხვა.

ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.