ევროპული საქართველოს ერთ-ერთი ლიდერი, გიორგი კანდელაკის თქმით, მანდატებზე უარის ართქმა იურიდიულად პარლამენტში შესვლის ტოლფასია, მანვე აღნიშნა, რომ მოლაპარაკებებში და საერთაშორისო ფრონტზე ოპოზიციის მთავარი და მძლავრი ბერკეტი ოპოზიციის ერთიანობაა. ამის შესახებ ის სოციალურ ქსელში წერს.

"რა შუაშია მანდატების დათმობა არდათმობა მოლაპარაკებების გაგრძელებასთან? ვინც მანდატს დათმობს მოლაპარაკებს ვერ გააგრძელებს? რა სისულელეა! სწორედ მანდატების დათმობა ქმნის იმ ახალ რეალობას, რის გამოც წნეხი ქართულ ოცნებაზე გაასკეცდება და რის გამოც საქართველოს საკითხებში მეტი პოლიტიკური ფიგურა ჩაერთვება ცივილიზებული სამყაროდან და შედეგიც სწორედ ამ გზით დადგება და არა პირიქით. მანდატებზე უარის ართქმა იურიდიულად პარლამენტში შესვლის ტოლფასია და მოლაპარაკებებში მთლიანად ოპოზიციის პოზიციებს ასუსტებს. ეს ორჯერ ორი ოთხია და ვინც სხვაგვარად ამბობს, უბრალოდ იტყუება", — წერს კანდელაკი.

დღეს, 11 დეკემბერს პარლამენტში მე-10 მოწვევის სხდომა მიმდინარეობს, რომელშიც მხოლოდ ქართული ოცნება იღებს მონაწილეობას. სხდომაზე ასევე არიან მიწვეული პრეზიდენტი, პატრიარქი და დიპლომატები. პატრიარქის ნაცვლად, სხდომას მისი მოსაყდრე, შიო მუჯირი ესწრება.

სხდომის პარალელურად, მოსწავლე ახალგაზრდობის სასახლის ეზოში შეკრებილმა ოპოზიციის ნაწილმა მანდატებზე უარი თქვა და ხელი მოაწერა საერთო მემორანდუმს ბოიკოტის შესახებ.