ოკუპირებული აფხაზეთის დე ფაქტო პრეზიდენტის, ასლან ბჟანიას საგარეო პოლიტიკის კონცეფციაში ქართულ-აფხაზური კონფლიქტის მოგვარებასა და საქართველოსთან ურთიერთობების ნორმალიზებაცაა ნახსენები. არ აღიარებულმა პრეზიდენტმა ე.წ. აფხაზეთის რესპუბლიკის საგარეო პოლიტიკის კონცეფციის დამტკიცების განკარგულებას ხელი მოაწერა. კონცეფციის თანახმად, დე ფაქტო აფხაზეთის რესპუბლიკის საგარეო პოლიტიკის ძირითადი პრინციპებია:

  • ეროვნული ინტერესების პრიორიტეტულობა;
  • გარე გამოწვევებსა და საფრთხეებზე აქტიური რეაგირება;
  • მრავალდონიანი გარე კონტაქტები;
  • თანამშრომლობის ღიაობა, რომელიც თანასწორობასა და ურთიერთპატივისცემას ემყარება.

დე ფაქტო პრეზიდენტის პრესცენტრის მიერ გავრცელებული ინფორმაციით, ოკუპირებული აფხაზეთის ეროვნული ინტერესების შესაბამისად, საგარეო პოლიტიკური ძალისხმევა შემდეგი მიზნების მიღწევას ისახავს მიზნად:

  • ეროვნული უსაფრთხოების უზრუნველყოფა, მოქალაქეების დაცვა, სუვერენიტეტისა და ტერიტორიული მთლიანობის განმტკიცება;
  • ე.წ. სახელმწიფოს სოციალურ-ეკონომიკური განვითარებისათვის ხელსაყრელი გარე პირობების შექმნა, დახმარება უცხოური ინვესტიციების მოზიდვისა და საზღვარგარეთ აფხაზეთის სავაჭრო-ეკონომიკური ინტერესების ხელშესაწყობად;
  • საზღვარგარეთ მყოფი მოქალაქეების უფლებებისა და კანონიერი ინტერესების დაცვა;
  • რუსეთის ფედერაციასთან სტრატეგიული პარტნიორობის განვითარება და განმტკიცება;
  • ურთიერთსასარგებლო პარტნიორობის განვითარება და განმტკიცება სახელმწიფოებთან, რომლებმაც ოკუპირებულ აფხაზეთთან დიპლომატიური ურთიერთობები დაამყარეს;
  • ოკუპირებული რეგიონის შემდგომი საერთაშორისო აღიარება;
  • აფხაზეთის დიასპორასთან ურთიერთობის გაძლიერება მსოფლიოს ყველა რეგიონში;
  • აფხაზეთის პოზიტიური საერთაშორისო იმიჯის ფორმირება და განმტკიცება;
  • ქართულ-აფხაზური კონფლიქტის მოგვარება და საქართველოსთან ურთიერთობების ნორმალიზება;
  • დახმარება კავკასიის რეგიონში მშვიდობისა და სტაბილურობის განმტკიცებაში;
  • აფხაზეთში გლობალურ და რეგიონალურ საერთაშორისო ინსტიტუტებში შესვლის მცდელობების გააქტიურება.