საქართველოს დემოკრატიული ინიციატივის მიერ ჩატარებული კვლევის მიხედვით, არსებობს ეჭვი იმასთან დაკავშირებით, რომ პირველ და მეორე ინსტანციის სასამართლოებში მოსამართლეთა გადაადგილებები არჩევნებთან დაკავშირებით განხორციელდა პალატების, კოლეგიების, ვიწრო სპეციალიზაციების ისეთი მოსამართლეებით დასაკომპლექტებლად, რომლებიც საჭიროების შემთხვევაში ხელისუფლების ინტერესების გათვალისწინებით მიიღებენ მიკერძოებულ გადაწყვეტილებას.

GDI-ში აცხადებენ, რომ მოსამართლეთა უმრავლესობა, რომლებიც ადმინისტრაციულ საქმეთა კოლეგიებში, პალატებსა თუ ვიწრო სპეციალიზაციებში გადავიდნენ წარმოადგენენ ან დაკავშირებული არიან სასამართლო სისტემაში არსებულ მოსამართლეთა გავლენიან ჯგუფთან. ორგანიზაციაში, ასევე, აღნიშნავენ, რომ მათი უმრავლესობის სამოსამართლეო კარიერა მრავალ გახმაურებულ საქმეს ითვლის, მათ შორის, 3 წლის გამოსაცდელი ვადით დანიშნული მოსამართლეებიც არიან, რომელთა დამოუკიდებლობის ხარისხი გარკვეული თვალსაზრისით ნაკლები შეიძლება იყოს უვადოდ დანიშნულ მოსამართლეებთან შედარებით.

GDI-ს კვლევა მიზნად ისახავს 2019-2020 წლებში, წინასაარჩევნოდ, პირველ და მეორე ინსტანციისსასამართლოების ადმინისტრაციულ საქმეთა პალატებში, კოლეგიებსა და საარჩევნო დავების ვიწრო სპეციალიზაციებში მოსამართლეების გადაადგილებაზე დაკვირვებასა და მათი მოძრაობის ტენდენციების გამოვლენას. მათივე თქმით, კვლევაში ყურადღება გამახვილებულია პირველი ინსტანციის სასამართლოების ადმინისტრაციულ საქმეთა კოლეგიებში მოსამართლეთა მორიგეობის სიის შედგენისა და მისი შემადგენლობის საკითხზეც. იქიდან გამომდინარე, რომ ზოგიერთ სასამართლოში არ არის განსაზღვრული სპეციალიზაციები, ასეთ სასამართლოებში მოსამართლეთა გადაადგილებას მოცემული კვლევა არ მოიცავს.

კვლევის მიხედვით, უკონკურსოდ მოსამართლეთა გადაადგილება სასამართლოებში, პალატებში, კოლეგიებში განსაკუთრებით 2019 წლის მაისიდან 2020 წლის ივლისის ჩათვლით იყო გახშირებული. ორგანიზაციის თქმით, ეს პროცესი არჩევნებამდე 3 თვით ადრე დასრულდა, რაც ეჭვს აჩენს, რომ ამ პერიოდში მოსამართლეთა გადაადგილება, შესაძლოა, სწორედ მოახლოებულ არჩევნებს უკავშირდებოდა. მათივე თქმით, ეს პროცესი 1 წლით ადრე, შესაძლოა, "კვალის დაფარვის" მიზნით დაიწყო, რათა შემდგომში მოსამართლეთა გადაადგილების დაკავშირება არჩევნების პერიოდთან მაქსიმალურად აერიდებინათ.

GDI-ს კვლევაში აღნიშნულია, რომ უკონკურსოდ მოსამართლეთა გადაადგილებები ადმინისტრაციულ საქმეთა პალატებში, კოლეგიებში 3 ყველაზე სტრატეგიულ და გადატვირთულ სასამართლოში შეინიშნებოდა, კერძოდ, თბილისის და ქუთაისი სააპელაციო სასამართლოებსა და თბილისის საქალაქო სასამართლოში. ორგანიზაციის თქმით, ამ გადაადგილების რეალური მიზეზი, მაღალი ალბათობით, სწორედ არჩევნებთან უნდა ყოფილიყო დაკავშირებული, რადგან ყველაზე მეტი საარჩევნო დავა, როგორც წესი, ძირითადად ამ სასამართლოებში შედის, შესაბამისად მოსამართლეთა გავლენიანი ჯგუფისათვის მნიშვნელოვანი იყო ამ სასამართლოებში ლოიალური მოსამართლეების გადაყვანა.

ორგანიზაციის განცხადებით, იმ მოსამართლეთა უმრავლესობა, რომლებიც ადმინისტრაციულ საქმეთა პალატებში/კოლეგიებშუ გადავიდნენ, სასამართლო სისტემაში არსებულ მოსამართლეთა გავლენიან ჯგუფთან დაახლოებული პირები არიან, გარდა ამისა თითქმის ყველა მათგანის სახელი გახმაურებელ საქმეებს უკავშირდება, რაც არჩევნების კონტექსტში განსაკუთრებით საგანგაშოა.