საქართველოს პრეზიდენტის, სალომე ზურაბიშვილის განცხადებით, "კიდევ ერთხელ გაამყარა ამერიკამ თავისი პოზიცია, მხარდაჭერა ჩვენი სუვერენიტეტისთვის და ტერიტორიული მთლიანობისთვის". პრეზიდენტის ეს განცხადება ადმინისტრაციამ ამერიკის სახელმწიფო მდივან, მაიკ პომპეოსთან შეხვედრის შემდეგ გაავრცელა.

"ჩვენი ყველაზე მნიშვნელოვანი და ყველაზე მტკივნეული საკითხი, რაც არის ოკუპირებული ტერიტორიები, ამის მიმართ კიდევ ერთხელ გაამყარა ამერიკამ თავისი პოზიცია, მხარდაჭერა ჩვენი სუვერენიტეტისთვის და ტერიტორიული მთლიანობისთვის და მზადყოფნა იმისთვის, რომ აქაც სამშვიდობო პროცესი, მოლაპარაკებები იყო განახლებული და გაძლიერებული, რაც ჩვენთვის არის უაღრესად მნიშვნელოვანი. ეს ყველაფერი ნიშნავს, რომ იქნება მეტი ამერიკა საქართველოში, რეგიონში და საქართველო რჩება ამერიკის პოლიტიკის ერთ-ერთი მთავარი და მყარი საყრდენი რეგიონში. ამისთვის ძალიან მადლობელი ვართ ამ ვიზიტისთვის და ამ შინაარსისთვის", — თქვა ზურაბიშვილმა.

საქართველოში ოფიციალური ვიზიტით ამერიკის შეერთებული შტატების სახელმწიფო მდივანი, მაიკ პომპეო იმყოფება. ის თავდაპირველად პრეზიდენტს სალომე ზურაბიშვილს შეხვდა, შემდეგ კი, პრემიერმინისტრ გიორგი გახარიას შეხვდა. შეხვედრა გაიმართა კათოლიკოს-პატრიარქ ილია მეორესთანაც. ამ წუთებში, პომპეო არასამთავრობო ორგანიზაციებთან მართავს შეხვედრას. აშშ-ის სახელმწიფო მდივანს არ აქვს დაგეგმილი შეხვედრები ოპოზიციასთან. ამ დროისთვის, ოპოზიცია რუსთაველის გამზირზე მდუმარე აქციის მართავს.

მაიკ პომპეო საქართველოს დღეს, 18 ნოემბერს დატოვებს.