შინაგან საქმეთა მინისტრის, ვახტანგ გომელაურის თქმით, თავდამსხმელისთვის თანამშრომლის, ავთო გალდავს მძევლად გაყოლის გადაწყვეტილების მიღება მისთვის მარტივი არ ყოფილა, რადგან არავინ იცოდა, დაბრუნდებოდა თუ არა იგი ცოცხალი.

"დიდი მადლობა მინდა ვუთხრა ავთო გალდავას, მან თავისი სიცოცხლე გასწირა. არ არის ეს ადვილი დამერწმუნებით, არც ჩემთვის იყო ადვილი ეს გადაწყვეტილება მიმეღო, რომ თანამშრომელი გამეგზავნა. ის დაბრუნდებოდა ან არ დაბრუნდებოდა ცოცხალი არავინ იცოდა. ურთულესი გადაწყვეტილება მივიღე. ბატონი ავთოსთვისაც იყო ძალიან მძიმე, მაგრამ ერთი წამითაც არ უთქვამს უარი, წარბი არ შეუხრია", — განაცხადა გომელაურმა.

გუშინ, 21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლებს შორის იყო სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. გავრცელებული ინფორმაციით, შეიარაღებულ პირთან მოლაპარაკებებს ის აწარმოებდა.

ამ დროისთვის თავდამსხმელის ადგილმდებარეობის ან ვინაობის შესახებ ინფორმაცია არ ვრცელდება. თავდასხმის დროს საქართველოს ბანკში მყოფი არცერთი პირი არ დაშავებულა.

გაიგე მეტი: