საზოგადობრივი მაუწყებლის გენერალური დირექტორობის კანდიდატი, ზაალ ანჯაფარიძე ამბობს, რომ ის შეიძლება ვერ იყოს საუკეთესო, მაგრამ ეცდება, რომ იყოს კარგი მენეჯერი. ასე უპასუხა მან საზოგადოებრივი მაუწყებლის სამეურვეო საბჭოს თავმჯდომარის, გრიგოლ გოგელიას კითხვას, რატომ ჰგონია, რომ ის არის ლიდერი, რომელიც მაუწყებელს სჭირდება.

ანჯაფარიძეს გასაუბრება სამეურვეო საბჭოსთან დღეს, 11 საათზე ჰქონდა. მან საზოგადოებრივი მაუწყებლის განვითარების ხედვებზე ისაუბრა.

„ჩემი ხედვა საზოგადობრივი მაუწყებლის შესახებ ეფუძნება, ერთი მხრივ, იმ პროგრამული დოკუმენტების ანალიზს, რომელიც შემუშავებული იქნა სამეურვეო საბჭოს მიერ. მეორე მხრივ, იმ საერთაშორისო პრაქტიკებს, საზოგადოებრივი მაუწყებლის განვითარების, რომელიც არსებობს სხვადასხვა დემოკრატიულ სახელმწიფოებში. პრინციპში, ჩემი ხედვა, ეს სასიამოვნო აღმოჩენა იყო ჩემთვის, ძირითადში მაინც დაემთხვა იმ ხედვებს, რაც არის წარმოდგენილი სამეურვეო საბჭოს მიერ 2015-2016 წლის პრიორიტეტებში“, - აღნიშნა ანჯაფარიძემ, რომელიც მიიჩნევს, რომ მაუწყებლის პრიორიტეტებში გათვალისწინებული - საზოგადოების ყველა ჯგუფს ინტერესებს ასახვისა და საზოგადოების ჩართულობის კომპონენტები - არ სრულდება.

დირექტორობის კანდიდატი მიიჩნევს, რომ საზოგადოებრივი მაუწყებელი ყველა ჯგუფის ინტერესებს უნდა აკმაყოფილებდეს და არჩევის შემთხვევაში ეცდება მაუწყებლის ბადე საზოგადოების ინტერესებს მოარგოს. თუმცა, ამავდროულად აღნიშნავს, რომ პროგრამები მეტ-ნაკლებად აკმაყოფილებს საზოგადოების ინტერესებს, ზოგ შემთხვევაში კი, გადაცემების განთავსების დრო არ არის კარგად შერჩეული.

„საზოგადოებრივ მაუწყებელს ეკისრება ძალან სერიოზული ფუნქცია, რომ ის გახდეს ჩვენ საზოგადოების კულტურის, ესთეტიკური გემოვნების, ცნობიერების, ინფორმატიულობის, განათლების, ღირებულებების და მისი ქცევის მოდუსის ჩამომყალიბებელი,“ - აღნიშნა ანჯაფარიძემ.

მისი ხედვით, საზოგადოებრივ მაუწყებელს უნდა ჰქონდეს ძლიერი სოციოლოგიური სამსახური, რათა დამოუკიდებლად, მომსახურების შესყიდვის გარეშე, შეძლოს ხშირად კვლევების ჩატარება და გაეცნოს საზოგადების მოთხოვნებსა და ინტერესებს.

მან პროგრამების გაუმჯობესებაზეც ისაუბრა: "ნიუსრუმი, რომელიც ახლა შენდება და უნდა ჩაეშვას მოხმარებაში, ალბათ, გარკვეულწილად, ამ პრობლემის აღმოფხვრას მოემსახურება," -

აღსანიშნავია, რომ საზოგადოებრივმა მაუწყებელმა ნიუსრუმის მშენებლობა 25 ნოემბერს შეაჩერა.

ანჯაფარიძე პირველია იმ 5 კანდიდატს შორის, რომელსაც სამეურვეო საბჭო მოუსმენს. საბჭო დღეს თინათინ ბერძენიშვილსა (13 საათი) და ნათია კუპრაშვილს (15 საათი) გაესაუბრება. ხვალ კი ვასილ მაღლაფერიძისა (11 საათი) და ნინო ზაუტაშვილის (13 საათი) გასაუბრებაა ჩანიშნული.