მთელი სამყარო შობა-ახალი წლის შესახვედრად სიმღერა Last Christmas-ით ემზადება. სწორედ ამ დროს კი BBC სამყაროს ამცნობს, რომ ლეგენდარული მომღერალი ჯორჯ მაიკლი 53 წლის ასაკში გარდაიცვალა.

როგორც პოლიცია აცხადებს, მისი სიკვდილი ჯერჯერობით "ამოუხსნელია", თუმცა, საეჭვო გარემოებები არ არსებობს.

The Guardian-ის ცნობით, ჯორჯ მაიკლის მენეჯერმა განაცხადა, რომ მომღერალს გულმა უმტყუნა, თუმცა, მისი სიკვდილის ოფიციალური მიზეზი მოგვიანებით, ექსპერტიზის შემდეგ გახდება ცნობილი.

გრემის ორგზის გამარჯვებულმა ინგლისელმა მუსიკოსმა სახელი დუეტ Wham!-ში სიმღერით გაითქვა, შემდეგ კი არანაკლებ წარმატებული სოლო კარიერა ჰქონდა, რომლის დროსაც ჯორჯ მაიკლმა 110 მილიონი ჩანაწერი გაყიდა. მისი 1987 წლის სადებიუტო ალბომი Faith ყველა დროის ერთ-ერთ გაყიდვად დისკად იქცა.

ჯორჯ მაიკლი საკუთარ სახლში, მშვიდ ვითარებაში გარდაიცვალა.