ევროპული საქართველოს ვაკის მაჟორიტარობის კანდიდატის, ელენე ხოშტარიას თქმით, კვოტირების ისეთი რადიკალური წინააღმდეგი, როგორიც იყო, აღარ არის. ამის შესახებ მან ფორმულასთვის მიცემულ ინტერვიუში ისაუბრა.

ჟურნალისტის კითხვაზე, ეთანხმებოდა თუ არა სახელმწიფოს მხრიდან გენდერული თანასწორობის ხელშეწყობის მიზნით დროებითი ზომების მიღებას, მაგალითად, კვოტირებას, ხოშტარიამ უპასუხა, რომ კვოტირება ახლაც არ მიაჩნია პრობლემის გადაჭრის გზად.

"იდეოლოგიურად არასწორი მგონია, იმ თვალსაზრისით, რომ პრობლემა მოგვარდება, არა რაოდენობით, არამედ უნარებზე ორიენტირებული (merit-based) სისტემის შექმნით. არ მგონია, რომ ეს კვოტები ახლა ხარისხობრივად შეცვლის, ამ ბარიერებს მოაცილებს. თუმცა, არც იმხელა ზიანი მგონია მოჰქონდეს, რომ ეს ექსპერიმენტი არ ჩაატარო. ზოგისთვის ეს არის მიუღებელი და დამანგრეველი. მე არ მგონია, რომ ზიანის მომტანია, მაგრამ არც გადაჭრის გზა მგონია", — განაცხადა ელენე ხოშტარიამ.