TV პირველის ტელეწამყვანის, ინგა გრიგოლიას განცხადებით, კორონავირუსზე ტესტირება 217 თანამშრომელმა გაიკეთა და ყველა უარყოფითია.

"TV პირველის მიერ თანამშრომლებისთვის ჩატარებული ტესტების პასუხი ასეთია — დღეს 217 კაცს გაუკეთდა ტესტი და 217-ვე პასუხი უარყოფითია", — წერს გრიგოლია.

გუშინ, 9 სექტემბერს ცნობილი გახდა, რომ კორონავირუსი დაუდასტურდათ პარლამენტის წევრს ლევან გოგიჩაიშვილსა და მის ცოლს, ვიკა ბუკიას, რომელიც TV პირველის თანამშრომელია.

პარლამენტის დამოუკიდებელი დეპუტატის, ლევან გოგიჩაიშვილის განცხადებით, ის ეპიდემიოლოგებს კონტაქტებს აწვდის და მათ შორის პარლამენტის წევრები და თანამშრომლები არ არიან. გოგიჩაიშვილის თქმით, იმ ხალხის სიას ადგენს, ვისთანაც ჰქონდა შეხება, პარლამენტში კი ბოლოს 3 სექტემბერს იმყოფებოდა.

გოგიჩაიშვილის პარტიაში აცხადებენ, რომ უახლოეს დღეებში ჩაუტარდებათ ტესტირება. რაც შეეხება წინასაარჩევნო კამპანიას, მათი თქმით, პარტია პაუზას იღებს.