ბოდბელი ეპისკოპოსი იაკობი მედიას ეკლესიაზე კრიტიკული ჟურნალისტური მასალების მომზადების გამო ემუქრება და ამბობს, რომ მზადაა ტელევიზიების ხელმძღვანელებს "სადაც და რომელ ტერიტორიაზეც უნდათ" ნებისმიერ დროს შეხვდეს. მისი განცხადებით, მედია ეკლესიის წინააღმდეგ იბრძვის და იმისთვის, რომ ეკლესია "დაამციროს", ხან რას "გამოჩხრეკს" და ხან რას.

მეუფე იაკობი ამტკიცებს, რომ დადგება დრო, "ერის დაჩაგვრასა" და ეკლესიაზე "მასე შეხებას" არავის აპატიებს და ტელევიზიის მმართველებს პირისპირ შეხვდება.

"ეს გამიჭირდება, სადმე შევხვდე მაგათ? მე რა უნდა მითხრან და როგორი ხასიათით გამოვლენ მერე. ჩანაწერსაც გავაკეთებ, რას ილაპარაკებენ და მერე ნახონ მაგათმა", — აცხადებს ეპისკოპოსი იაკობი.

მისივე თქმით, იმისთვის, რომ ყველამ საკუთარი ადგილი იცოდეს, დროა, სხვა მღვდელმთავრებმაც ამოიღონ ხმა.

"არ შეიძლება ახლა, გამოვდიოდე და მე ვამბობდე სულ რაღაცას, უნდა ამოიღონ ხმა, ყველამ უნდა ამოიღოს ხმა. თავიანთი ადგილი უნდა ჰქონდეს ყველას. კამპანია არის პირდაპირ ეკლესიის წინააღმდეგ რამდენი წელია. ვინმე უვარგისი თუ გვყავს ეკლესიაში ყველას იცავენ და აბსოლუტურად რა, ცოტა ხანში ღმერთის გინებასაც დაიწყებენ მაგენი, შორს არ არიან", — ამბობს იგი.