ევროპულმა საქართველომ მისი რეგისტრაციიდან მოხსნის შესახებ საქალაქო სასამართლოში შეტანილი სარჩელი მოიგო. ამის შესახებ On.ge სერგი კაპანაძეს ესაუბრა.

კაპანაძის თქმით, სარჩელის თანახმად, რომელიც მოძრაობა, "სამართლიანი საქართველოსთვის" ლიდერმა, სერგო ჯავახაძემ შეიტანა, ევროპულმა საქართველომ საარჩევნო კოდექსით გათვალისწინებული ვადა დაარღვია. ამას კაპანაძე უარყოფს და ამბობს, რომ ეს ნაბიჯი უფრო გაფრთხილებას ჰგავდა ქართული ოცნების მხრიდან, "რომ ნუ აწვებით პატრიოტთა ალიანსს".

"სუს-ის და ქართული ოცნების უცნაური ჩანაფიქრის მქონე ნაბიჯი იყო. დამუქრების ტიპის, რომ აი, შეიძლება, მოგხსნათ საარჩევნო რეგისტრაციიდან. მაშინ, როცა პატრიოტთა ალიანსის საკითხი, რომლის წინააღმდეგაც სერიოზული ეჭვები არსებობს, არ განხილულა. იმას, რასაც ისინი ითხოვდნენ, შინაარსი არ გააჩნდა, რაღაც აბსურდია, ბოდვაა, ზუსტად არც ვიცით, რას გვედავებიან. უბრალოდ, დამოკლეს მახვილივით ჩამოკიდეს ჩვენს თავზე. ჩვენ საქალაქო სასამართლოში მოვიგეთ ეს ამბავი", — განაცხადა სერგი კაპანაძემ.

სერგი კაპანაძე აღნიშნავს, სარჩელი აბსურდული იყო და სასამართლოზე თავად სარჩელის შემტანმაც, ვერ ახსნა, რას გულისხმობდა. მისივე განმარტებით, ჯავახაძეს ეს ნაბიჯი სუს-მა და ქართულმა ოცნებამ გადაადგმევინა, რადგან "თავად არავის მოაფიქრდებოდა ასეთ აბსურდზე საჩივრის შეტანა".