აჭარის მთავრობის ყოფილი თავმჯდომარე და უკრაინის საინვესტიციო ოფისის ხელმძღვანელი ლევან ვარშალომიძე აცხადებს, რომ წინასაარჩევნოდ ბათუმში ჩამოდის. ნაციონალური მოძრაობის წევრის განცხადებით, თუ ვინმეს ეგონა, უკრაინაში მაღალი პოზიციის გამო საქართველოს ბედზე ხელს ჩაიქნევდა და "ამ საბედისწერო მომენტში პირად კომფორტს ამჯობინებდა", შეცდა.

"მე ახლა ვარ ტრაპზონში და ზუსტად ორ საათში ჩემს საყვარელ ბათუმში თქვენთან ერთად ვიქნები, რათა ერთად მოვიშოროთ თავს მოხვეული რუსული ოცნება, შევწყვიტოთ ეკონომიკის უკუსვლა და სახელმწიფო ინსტიტუტების ნგრევა. ჩვენ ერთად გადავლახავთ ამ ისტორიულ გაუგებრობას და ჯერ არარსებული ტემპით განვავითარებთ ჩვენს ულამაზეს საქართველოს", — აცხადებს ვარშალომიძე ვიდეომიმართვაში.

ვარშალომიძემდე საქართველოში ჩამოსვლა და "არჩევნებში წინა ხაზზე ბრძოლა" დააანონსა ნაციონალური მოძრაობის ლიდერმა და ექსპრეზიდენტმა მიხეილ სააკაშვილმაც. ეს პირველი შეთხვევა არ არის, როდესაც ის დაბრუნების პირობას დებს.