ქარიშხალი ლაურას გამო ლუიზიანაში ათასობით ადამიანი თავშესაფარშია გადაყვანილი. ძლიერმა ქარმა სახლებს სახურავები გადახადა და შენობების ფანჯრები ჩამსხვრია, ამის გარდა, ბუნებრივმა სტიქიამ კონფედერატის ის საკამათო ძეგლიც ჩამოაგდო, რომელიც შტატის ქალაქ ლეიქ-ჩარლზში იყო აღმართული.

მოქალაქეები კონფედერატი მეომრის ძეგლის ჩამოხსნასაც ითხოვდნენ, თუმცა დაახლოებით 2 კვირის წინ, ჟიურის წევრებმა მის შენარჩუნებას მხარი დაუჭირეს. 105 წლის ძეგლი სასამართლოს ეზოში იდგა.

აშშ-ში აფროამერიკელი მოქალაქის, ჯორჯ ფლოიდის გარდაცვალების შემდეგ ბოლო პერიოდში მსოფლიოს მრავალ კუთხეში საპროტესტო აქციების ფარგლებში იმ ისტორიული ფიგურების ძეგლები ჩამოაგდეს ან მოხსნეს, რომლებიც სხვადასხვა ფორმით რასიზმში არიან დადანაშაულებულები.

მაგალითად, დიდ ბრიტანეთში ცნობილი მონებით მოვაჭრის, ედვარდ კოლსტონის ძეგლი ჩამოაგდეს; ბელგიაში ლეოპოლდ მეორის ძეგლი აიღეს; ამერიკის შეერთებულ შტატებში კი კოლუმბის ძეგლი ტბაში გადააგდეს.

რაც შეეხებათ კონფედერატებს, ისინი მე-19 საუკუნეში აშშ-სგან გამოყოფას და დამოუკიდებელი სახელმწიფოს დაარსებას ითხოვდნენ, რასაც 1861-65 წლებში ამერიკის ჩრდილოეთისა და სამხრეთის შტატებს შორის სამოქალაქო ომი მოჰყვა. კონფედერატები ასევე მხარს უჭერდნენ მონათმფლობელობას.

ცოტა ხნის წინ, სწორედ ლუიზიანაში ადგილობრივებმა შექმნეს პეტიცია და შტატის გუბერნატორს, ჯონ ბელ ედვარდს მოუწოდეს, რომ კონფედერატთა ძეგლები ბრიტნი სპირსის ძეგლებით ჩანაცვლებულიყო.