ინგლისში, დერდლ-დორის ბუნებრივი თაღის მახლობლად, თვითმხილველებმა აღწერეს ის მომენტი, როცა ზღვაში დახრჩობის საფრთხის ქვეშ მყოფი კაცის გადასარჩენად სანაპიროზე ხალხმა ადამიანების "ჯაჭვი" შექმნა.

ინციდენტი ხუთშაბათს, 20 აგვისტოს, მოხდა, როცა იურული სანაპიროს პოპულარული ტურისტული ღირსშესანიშნაობის მახლობლად დიდი ტალღები მოეხეთქა.

ზღვაში მოცურავეს ტალღები სანაპიროზე გამოსვლის საშუალებას არ აძლევდა. თავდაპირველად სანაპიროზე მყოფი ხალხი დარწმუნებული არ იყო, ის უბრალოდ ხელს იქნევდა თუ გასაჭირში იყო. როცა დარწმუნდნენ, რომ კაცს დახმარება სჭირდებოდა, სანაპიროზე მყოფებმა ადამიანების ჯაჭვი შექმნეს მის გადასარჩენად.

ჯენი ბელმა, რომელიც იმ ადგილას ოჯახთან ერთად ისვენებდა, თქვა, რომ ის ტალღების სიდიდემ და სიძლიერემ სანაპიროზე მოსვლისთანავე შეაშფოთა.

"ერთი კაცი შევიდა და გაცურა. ის წყალქვეშა დინებამ სანაპიროდან შორს წაიყვანა, თუმცა გარკვეული ძალისხმევის ფასად მან მოახერხა უკან გამოცურვა. ცოტა ხნის შემდეგ წყალში კიდევ ერთი ადამიანი შევნიშნე და მალევე ჩემთვის და სანაპიროზე მყოფი სხვა ხალხისთვის აშკარა გახდა, რომ ის ნაპირზე გამოცურვას ვერ ახერხებდა. მას წყალქვეშა დინება მიათრევდა. ბოლოს ყველანი ფეხზე ვიდექით და ვუყურებდით, რა ხდებოდა. ნაპირიდან ერთი კაცი უხმობდა, მაგრამ მოცურავე გამოსვლას ვერ ახერხებდა. ბოლოს უკვე პლაჟზე ადამიანთა ჯგუფი დავინახეთ, რომელიც ზღვაში მყოფს უყვიროდა, განსაზღვრულ ტალღებზე გაეცურა, რისი წყალობითაც მან ცოტა უფრო ახლოს მოახერხა მოსვლა, მაგრამ წყლიდან მაინც ვერ ამოდიოდა. მერე ბევრმა ადამიანმა ხელები ჩასჭიდა ერთმანეთს და წყალში შემავალი ადამიანების ჯაჭვი შეიქმნა", — თქვა ჯენი ბელმა.

პლაჟზე თვითმხილველებს შორის ემილი ფუტიც იყო, რომელმაც მომხდარზე კომენტარი გააკეთა.

"იმის გამო, რომ ზღვა ასეთი ძლიერი იყო, ის, პირდაპირი გაგებით, მათ ეხეთქებოდა და ორი თუ სამი ადამიანი მჭიდროდ იყო ერთმანეთს ჩაჭიდებული. ზღვაში სამაშველო დაფა და საცურაო ჟილეტი გადააგდეს... თუმცა წყალმა ორივე უკან გამოისროლა. ერთი ტიპი პირდაპირ შეხტა ზღვაში, მაგრამ მოცურავეს მაინც ვერ მიუახლოვდა, რადგან ტალღები ძალიან ძლიერი იყო. მეგონა, მარადისობამ ჩაიარა, სანამ მოცურავე ნაპირს მოუახლოვდა და ხალხმა მისი პლაჟზე ამოთრევა მოახერხა", — თქვა ემილი ფუტმა.

Lulworth Coastguard-ის სამაშველო სამსახურის თქმით, პირველი დაზარალებულიც და ერთ-ერთი მაშველიც წყალში რთულ სიტუაციაში აღმოჩნდნენ, თუმცა მათი გადარჩენა მოხერხდა.

"დიდი ტალღებისა და გაზაფხულის მიქცევა-მოქცევის გამო ჩვენ ზღვაში ცურვასა და სერფინგს მკაცრად არ ვუწევთ რეკომენდაციას, განსაკუთრებით ისეთ ღია პლაჟებზე, როგორიც დერდლ-დორია. წყლის უკუდინება ძალიან ძლიერია და ის უპრობლემოდ გამოგაცლით მიწას ფექვეშ. თუკი ნაპირზე ვინმე გასაჭირში მყოფს დაინახავთ, დარეკეთ 999-ზე და სამაშველო სამსახური ითხოვეთ", — ამბობს სამაშველო სამსახური.