NDI-ს ანგარიშში, რომელიც დღეს, 19 ივნისს გამოქვეყნდა, აღნიშნულია, რომ არჩევნების სანდოობასთან დაკავშირებული გარკვეული საკითხები კვლავ გამოწვევად რჩება, რაც კიდევ უფრო აძლიერებს პოლარიზაციას და საარჩევნო პროცესის მიმართ საზოგადოების ნდობას აკნინებს.

პრობლემატურ საკითხებს შორის გამოყოფილია:

  • უყურადღებო ან მიკერძოებული აღსრულება;
  • ადმინისტრაციული რესურსებისა და სასამართლო;
  • ძალაუფლების ბოროტად გამოყენება; დაშინება და შევიწროება;
  • პერსონიფიცირებული და პოლარიზებული საარჩევნო კამპანია;
  • ნაკლებად წარმოდგენილი ჯგუფების პროცესიდან გამოტოვება;
  • საინფორმაციო გარემოს დაბინძურება.

ანგარიშის მიხედვით, დამოუკიდებლობის თითქმის 30 წლის განმავლობაში საქართველომ დაამტკიცა, რომ მას სანდო არჩევნების ჩატარების ტექნიკური შესაძლებლობები გააჩნია. ასევე, ქვეყანამ მნიშვნელოვანი ნაბიჯები გადადგა პოლიტიკაში ქალთა მონაწილეობის გასაზრდელად და გზა გაუხსნა სრულად პროპორციულ საარჩევნო სისტემას, რის გამოც, მოქალაქეებს მაღალი მოლოდინი აქვთ, რომ წლევანდელი არჩევნები დემოკრატიულ გარემოში ჩატარდება.

"არჩევნების მოახლოებასთან ერთად, კიდევ უფრო მნიშვნელოვანია, რომ ქვეყნის ლიდერებმა და მონაწილე მხარეებმა მსგავსი სიმტკიცე გამოიჩინონ და სამართლიანი, გამჭვირვალე და ინკლუზიური არჩევნები ჩაატარონ, რომელიც საქართველოს მოსახლეობის ნებას გამოხატავს", — განაცხადა განაცხადა NDI-ის პრეზიდენტმა, დერეკ მიტჩელმა.

მისივე თქმით, დემოკრატიული არჩევნების ჩატარებისთვის საქართველოში მყარი საფუძველი არსებობს. თუმცა აღნიშნავს, რომ შემდგომი რეფორმების გარეშე, დემოკრატიული ინსტიტუტების მიმართ მოსახლეობის ნდობის შემცირების ტენდენცია კვლავ გაგრძელდება. ამიტომ, მონაწილე მხარეებმა პოლიტიკური ნება უნდა გამოიჩინონ და საარჩევნო პროცესის სამართლიანობა პარტიულ ინტერესებზე მაღლა დააყენონ.

NDI-ის დელეგაცია მთავრობის, პოლიტიკური პარტიების, ცენტრალური საარჩევნო კომისიის, სამოქალაქო საზოგადოების, მედიის, ადგილობრივი და საერთაშორისო სადამკვირვებლო ორგანიზაციებისა და დიპლომატიური მისიების წარმომადგენლებს ესაუბრა. ანგარიში, ასევე, ითვალისწინებს ინსტიტუტის მიერ საქართველოში საქმიანობის 25 წლის მანძილზე დაგროვილ გამოცდილებას.