პროკურორმა ნანა გუგუტიშვილმა ჟურნალისტებს განუცხადა, რომ ბრალდების მხარის შუამდგომლობა ახალი მტკიცებულებების დასაშვებობასთან დაკავშირებით დაკმაყოფილდა. გიორგი შაქარაშვილის საქმეზე დაკავებული 6 არასრულწლოვანის საქმის არსებითი განხილვა მცხეთის რაიონულ სასამართლოში გაიმართა.

"დღევანდელ პროცესზე, როგორც თქვენთვის ცნობილია, გაიმართა გიორგი შაქარაშვილის საქმეზე დაკავებული 6 არასრულწლოვნის საქმის არსებითი განხილვა. პირველ რიგში სასამართლომ განიხილა შუამდგომლობა, დამატებითი მტკიცებულებების დასაშვებლობასთან და ბრალდების მხარის მიერ წარდგენილი მტკიცებულებები დასაშველად ცნეს, მიუხედავად დაცვის მხარის პოზიციისა, რომ არ უნდა ყოფილიყო დასაშვები. ვინაიდან დაცვის მხარის პოზიცია იყო დაუსაბუთებელი, ამ შემთხვევაში, აღნიშნულიდან გამომდინარე, სასამართლომ არ გაიზიარა მათი პოზიცია. ბრალდების მხარემ წარადგინა შესავალი სიტყვა. აცილების საკითხს ჩემი კოლეგის მიმართ, მოგახსენებთ, რომ მოსამართლემ აღნიშნულთან დაკავშირებითაც იმსჯელა დ არასრულწლოვანი ზ.ხ-ს და მისი ადვოკატის შუამდგომლობა დაუსაბუთებლად მიიჩნია, აქედან გამომდინარე, ჩემი კოლეგა არ იქნა აცილებული საქმეს", — განაცხადა პროკურორმა.

პროკურორის თქმით, დაცვის მხარემ დღეს შესავალი სიტყვა არ წარადგინა, შესაბამისად შემდეგი სასამართლო სხდომა 20 აგვისტოს ჩაინიშნა.

"დაცვის მხარეს არ წარმოუდგენია შესავალი სიტყვა, მათ განმარტეს, რომ არ იყვნენ მზად შესავალი სიტყვის წარმოსათქმელად. შემდეგი სხდომა გაიმართება 20 აგვისტოს", — თქვა გუგუტიშვილმა.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც-ს; ლ.შ-ს; ნ.ქ-ს და გ.მ-ს გამოძიება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას ედავება. ხოლო მათგან ორს — ზ.ხ-ს და ა.ქ-ს, გარდა ამ მუხლებისა, გამოძიება განზრახ ჯგუფურად ჩადენილ მკვლელობას ედავება.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.