საქართველოს პრემიერმინისტრმა, გიორგი კვირიკაშვილმა, დღეს გამართულ მთავრობის სხდომაზე განაცხადა, რომ საქართველოს 2017 წლის ბიუჯეტი ფისკალურ მდგრადობასა და სწრაფ ეკონომიკურ განვითარებაზეა ორიენტირებული.

მან უსამართლო უწოდა, ეკონომიკურ მდგომარეობასთან დაკავშირებით, ოპოზიციიდან წამოსულ კრიტიკას:

"ჩვენ გვესმის მოსახლეობის წინაშე არსებული პრობლემები და გვესმის ყველაზე უკეთ, სხვათა შორის. ძალიან ადვილია ასეთ დროს პოლიტიკური ქულების დაწერა ჩვენი ოპონენტების მხრიდან, მაგრამ მე მინდა ვთქვა, რომ ეს ვითარება აუცილებლად შეიცვლება, ვინაიდან ჩვენ ვგრძნობთ პასუხისმგებლობას.

2012 წლის შემდეგ ქართული ლარი გაუფასურებულია 60-65 პროცენტის ფარგლებში და რა თქმა უნდა, ეს არ არის კარგი. ამიტომ, მე მინდა ვთქვა, რომ საქართველო, თავისი ეკონომიკური განვითარების დინამიკით, მიუხედავად ყველა იმ გამოწვევისა, რომელშიც ჩვენ ვიმყოფებით და მიუხედავად იმ სოციალური ფონისა, რომელშიც ჩვენი მოსახლეობა იმყოფება, გამომდინარე ჩვენი ქვეყნის განვითარების დონიდან, იმყოფება ძალიან კარგ პირობებში იმისათვის, რომ ჩვენ ვიმსჯელოთ მომავალ, ძალიან მნიშვნელოვანი განვითარების გეგმებზე. ჩვენ გვჭირდება იმ მიმართულებებზე უფრო მეტი აქცენტის გაკეთება, რომელსაც შეუძლია სავალუტო შემოსავლების გენერირება".