2018 წელს დაანონსდა, რომ ცნობილ ანიმაციურ სერიალ Avatar: The Last Airbender-ის მიხედვით ნეტფლიქსი ახალ სერიალს გადაიღებდა, რომლის შექმნაშიც მონაწილეობას ამ გახმაურებული ანიმაციური პროექტის შემქმნელებიც მიიღებდნენ.

თუმცა სულ ცოტა ხნის წინ ცნობილი გახდა, რომ ნეტფლიქსი ამ ცნობილი ანიმაციის სატელევიზიო ადაპტაციას მისი თავდაპირველი შემქმნელების — მაიკლ დიმარტინოსა და ბრაიან კონიეცკოს გარეშე გადაიღებს:

"ბევრი თქვენგანი მეკითხება, თუ რა სიახლეა ნეტფლიქსის პროექტზე და ახლა საბოლოოდ შემიძლია გიპასუხოთ, რომ ავატარის სატელევიზიო ეკრანიზაციის შექმნაში მონაწილეობას აღარ ვიღებ. ამ წლის ივნისში, ორწლიანი მუშაობის შემდეგ ბრაიან კონიეცკომ და მე ეს მძიმე გადაწყვეტილება მივიღეთ", — ვკითხულობთ ღია წერილში, რომელიც დიმარტინომ 12 აგვისტოს გამოაქვეყნა.

როგორც დიმარტინო ამ ოფიციალურ განცხადებაში აღნიშნავს, თავიდან ის და კონიეცკო ნეტფლიქსმა დაიქირავა, რათა მომავალი სერიალისთვის მათი ხედვა გაეზიარებინათ, თუმცა ყველაფერი სულ სხვაგვარად განვითარდა.

"მასშტაბურ პროექტებზე მუშაობისას ყოველთვის იჩენს თავს გაუთვალისწინებელი პრობლემები. ჩემი კარიერის განმავლობაში ბევრჯერ მომხდარი მსგავსი რამ და მეც ჰაერის მბრძანებელივით ვცდილობ, მშვიდად გავუმკლავდე მათ. მაგრამ ჰაერის მბრძანებელმაც კი ზუსტად იცის, როდის აღარ აქვს აზრი ფუჭად მცდელობას", — წერს დიმარტინო.

ფოტო: Nickelodeon

ანიმაციის სულისჩამდგმელი ერთგულ ფანებს მომავალი სანახაობის მიმართ არსებულ იმედს ბოლომდე არ უწურავს, თუმცა აფრთხილებს, რომ ახალი სერიალი განსხვავებული ინტერპრეტაციის იქნება, რაშიც თავდაპირველ შემქმნელებს წვლილი არ მიუძღვით:

"ვინ იცის, ნეტლიქსის ადაპტაციას ნამდვილად აქვს პოტენციალი, რომ კარგი გამოვიდეს. ერთადერთი, რისი თქმაც ახლა დანამდვილებით შემიძლია, ისაა, რომ ნებისმიერ ვერსია, რომელსაც მომავალში ეკრანზე იხილავთ, არ არის ის, რისი განხორციელებაც მე და ბრაიანს გვქონდა ჩაფიქრებული".

Avatar: The Last Airbender თავდაპირველად Nickelodeon-სთვის შეიქმნა და ის პირველად ეკრანებზე 2005 წელს გამოჩნდა. სამსეზონიანმა ანიმაციურმა შოუმ მაყურებლების დიდი მოწონება დაიმსახურა და მას დღემდე ურიცხვი გულშემატკივარი ჰყავს, რომლებიც მოუთმენლად ელიან ნეტფლიქსის ახალი ადაპტაციის ხილვას.