საქართველოს პარლამენტის თავმჯდომარისთვის საკონსტიტუციო კომისიის ლეგიტიმაციასთან დაკავშირებით დასმული კითხვები მიუღებელია. ირაკლი კობახიძე კომისიაში პრეზიდენტის ადმინისტრაციიდან კონკრეტული კანდიდატების წარდგენას ელის:

"საქართველოს პარლამენტის დადგენილება ითვალისწინებს პრეზიდენტის ადმინისტრაციის წარმომადგენელთა მუშაობას საკონსტიტუციო კომისიაში. ჩვენ დაველოდებით, რა თქმა უნდა, მათ წარდგინებას, შესაბამისი კანდიდატების წარმოდგენას. რაც შეეხება საკონსტიტუციო კომისიის ე.წ. ლეგიტიმაციას, ეს სიტყვა საერთოდ რა კავშირშია საკონსტიტუციო კომისიასთან, მე საერთოდ არ მესმის. რაც შეეხება ამ ე.წ. ლეგიტიმაციას ამ კუთხით არანაირი პრობლემა არ შეიქმნება."

9 დეკემბერს კი ცნობილი გახდა, რომ საკონსტიტუციო კომისიას პარლამენტის თავმჯდომარე უხელმძღვანელებს. ამასთან დაკავშირებით, პრეზიდენტის მრჩეველმა პოლიტიკურ საკითხებში, ფიქრია ჩიხრაძემ განაცხადა, რომ კობახიძის ეს ნაბიჯი ვიწრო, ფორმალისტური მიდგომებიდან გამომდინარეობდა:

"ძალიან დასანანია ამავდროულად ის, რომ პარლამენტის თავმჯდომარემ, ახალგაზრდა პოლიტიკოსმა, პირველი სერიოზული პოლიტიკური ნაბიჯი გადადგა არა ფართო პოლიტიკურ კონტექსტის გათვალისწინებით, არამედ საკმაოდ ვიწრო, ფორმალისტური მიდგომებიდან გამომდინარე, რაც კიდევ ვიმეორებ, ამ ძალიან მნიშვნელოვან პროცესს სერიოზულად აზარალებს."

გიორგი მარგველაშვილმა მეცხრე მოწვევის პარლამენტის პირველ სხდომაზე გიორგი კვირიკაშვილს საკონსტიტუციო კომისიის განსხვავებული ფორმატი, პრეზიდენტის, პრემიერ-მინისტრისა და პარლამენტის თანათავმჯდომარეობით შესთავაზა.

22 ნოემბერს, პრეზიდენტის პრესსპიკერმა განაცხადა, რომ მმართველმა გუნდმა მარგველაშვილის შეთავაზებაზე უარი თქვა.