მწვანეთა პარტიის ლიდერის, გია ჟორჟოლიანის თქმით, ბიძინა ივანიშვილის დენდროლოგიური პარკი, სადაც ხეების გადატანას აქტივისტები აპროტესტებდნენ, ბიომრავალფეროვნების მუზეუმია.

როგორც ჟორჟოლიანი ამბობს, პარკი არა მხოლოდ ეკოლოგიური, არამედ "აღმზრდელობითი" მნიშვნელობითაც გამოირჩევა.

"ეს არის ხეების კოლექცია, რომელშიც არა მარტო საქართველოდან გადმოტანილი ხეებია განლაგებული, არამედ მთელი მსოფლიოდან. ეს არის ბიომრავალფეროვნების მუზეუმი. ამიტომ ამის შექმნა უდიდესი საქმე იყო საქართველოს არა მარტო ეკოლოგიური თვალსაზრისით, არამედ წმინდა აღმზრდელობითი, ტურიზმისა და ა.შ. სხვათა შორის, სამეცნიერო თვალსაზრისითაც", — განაცხადა გია ჟორჟოლიანმა.

შეკვეთილის დენდროლოგიური პარკი ჯერ კიდევ გახსნამდე იმით გახდა პოპულარული, რომ იქ ქვეყნის სხვადასხვა კუთხიდან გიგანტური ხეები ხმელეთით ან ზღვით გადაჰქონდათ. მათ შორის ყველაზე "პოპულარული" შავ ზღვაში მოცურავი ტიტის ხე გახდა. გურიის მოამბის ცნობით, დენდროლოგიურ პარკში გადატანილი ასწლოვანი ტიტას ხე გახმა და მოჭრეს.

ხეების გადატანას აქტივისტები და ადგილობრივების ნაწილი აპროტესტებდნენ. ხშირად გიგანტური ხის გადატანისას იხერგებოდა გზა, ზიანდებოდა ელექტრონული სადენები და იჩეხებოდა სხვა ხეები. ხეების გადარგვა არ შეწყვეტილა საგანგებო მდგომარეობის დროსაც.

თავად ბიძინა ივანიშვილი კი ამტკიცებდა, რომ გადარგვისას გიგანტური ხეები გადაარჩინა, რადგან მათი ნაწილი გადაშენების პირას იყო. მან, ასევე, აღიარა, რომ ასი ათასობით ხე აქვს გადარგული.