პარლამენტში ქართული ოცნების დეპუტატი და ვიცე-სპიკერი, გოგა კახიანია აცხადებს, რომ თუ არჩევნები კორონავირუსის გავრცელების საფუძველი შეიძლება გახდეს, ხელისუფლებამ ეს არ უნდა დაუშვას. მან სპეკულაციები უწოდა ოპოზიციის განცხადებებს, რომ მმართველ გუნდს არჩევნების გადადება სურს.

"ჩვენ გამოვდივართ კონკრეტული მოცემულობიდან და ვხელმძღვანელობთ საზოგადოების ინტერესებიდან. თუ თეორიულად არჩევნები შესაძლოა, გახდეს ვირუსის გავრცელების საფუძველი, ბუნებრივია ეს ხელისუფლებამ არ უნდა დაუშვას. შესაძლებელია აქედან გამომდინარე საგანგებო მდგომარეობაც გამოცხადდეს. საგანგებო მდგომარეობის პირობებში კი არჩევნების ჩატარება კონსტიტუციით არ შეიძლება", — განაცხადა კახიანმა.

კანონის თანახმად, არჩევნების ჩატარება შესაძლებელია საგანგებო მდგომარეობის დასრულებიდან არაუადრეს 45 და არაუგვიანებს 60 დღისა.

13 ივნისს ქართული ოცნების ერთ-ერთმა ლიდერმა, ირაკლი კობახიძემ განაცხადა, რომ თუ კორონავირუსის მეორე ტალღა დაემთხვევა არჩევნებამდე პერიოდს [31 ოქტომბრამდე], თეორიულად, არჩევნების თარიღის გადაწევა შესაძლებელია. მანვე აღნიშნა, რომ ეს იმ შემთხვევაში მოხდება, თუკი მთავრობა ოქტომბერში ისევ საგანგებო მდგომარეობას გამოაცხადებს.

კობახიძის თქმით, კონსტიტუციის თანახმად, წელს არჩევნები 31 ოქტომბერს უნდა გაიმართოს, მეორე ტური კი, წესით — 21 ნოემბერს.