თავდაცვის და უშიშროების კომიტეტმა 24 ნოემბერს გამართულ სხდომაზე, ოპოზიციის კვოტით თავმჯდომარის მოადგილე ვერ აირჩია.

ემზარ კვიციანს მხარი ხუთმა დეპუტატმა დაუჭირა, ხოლო ირაკლი აბესაძეს რვა დეპუტატმა. გადაწყვეტილების მისაღებად ცხრა ხმა იყო საჭირო.

კენჭისყრამდე კომიტეტის თავმჯდომარემ, ირაკლი სესიაშვილმა კომიტეტის წევრებს მიმართა, რომ 15 კომიტეტიდან 12 კომიტეტში თავმჯდომარის პოზიციაზე უნდა იყოს ნაციონალური მოძრაობის წევრი, სამ კომიტეტში კი პატრიოტთა ალიანსის წევრი. მან მოუწოდა წევრებს მხარდაჭერა გამოეცხადებინათ ნაციონალური მოძრაობის წარმომადგენლის ირაკლი აბესაძესთვის, ვინაიდან პატრიოტთა ალიანსს უკვე ათვისებული აქვს სამი კვოტა:

"მიუხედავად ჩვენი პირადი სიმპათია-ანტიპათიისა, ამ შემთხვევაში ასეთი პოლიტიკური მოცემულობა არის რომ პატრიოტთა ალიანსმა თავისი სამი კვოტა აითვისა. ეს არის პოლიტიკური შეთანხმება, ამიტომ გთხოვთ, ამ შეთანხმებას მხარი დაუჭიროთ"

ჯერჯერობით, პატრიოტთა ალიანსს ოპოზიციის კვოტით 3 კომიტეტში ჰყავს თავმჯდომარის მოადგილე, ხოლო ნაციონალურ მოძრაობას - 11 კომიტეტში.