იტალიაში ათასობით მიგრანტს, მათ შორის ქართველები, ლეგალურად დასაქმების საშუალება ექნებათ. Al Jazeera-ს ინფორმაციით, არალეგალი მიგრანტები დროებით ბინადრობისა და მუშაობის ნებართვას მიიღებენ. ინიციატივა შემუშავებულია ეკონომიკის სტიმულირების პაკეტის ფარგლებში, რომელიც 59,6 მილიარდ დოლარს მოიცავს და ეკონომიკაზე კორონავირუსის გავლენის შემსუბუქებაზეა მიმართული.

გამოცემის ინფორმაციით, რამდენიმეკვირიანი დაძაბული მოლაპარაკებების შემდეგ, იტალიის კოალიციური მთავრობა 13 მაისს ცვლილებებზე საბოლოოდ შეთანხმდა.

იტალიის შინაგან საქმეთა მინისტრის პრესსპიკერმა, დინო მარტირანომ AlJazeera-ს განუცხადა, რომ იმ პირებს, რომლებიც სახლებსა და სოფლის მეურნეობის სფეროში არიან დასაქმებული ნოემბრიდან ლეგალურად ბინადრობის ნებართვაზე განაცხადის გაკეთებას შეძლებენ. ახალი ნებართვა ექვსი თვის განმავლობაში იმოქმედებს.

იტალიის პრემიერმინისტრის, ჯუზეპე კონტეს განცხადებით, მთავრობამ მნიშვნელოვან შედეგს მიაღწია.

"ეს ცივილიზაციის ბრძოლაა, რადგან მის ცენტრში არის ადამიანის ღირსება, ბრძოლა კრიმინალურ ორგანიზაციებთან, მრომით ექსპლუატაციასთან", — განაცხადა კონტემ.

აღნიშნული ინიციატივის გამო პოლიტიკური უთანხმოება იყო იტალიის კოალიციურ მთავრობაში, რომელსაც ხუთი ვარსკვლავის მოძრაობა და მემარცხენე-ცენტრისტული დემოკრატიული პარტია (PD) ხელმძღვანელობს.

მიგრანტების საქმიანობის ლეგალიზაციის წინადადება სოფლის მეურნეობის მინისტრმა, ტერეზა ბელანოვამ წამოაყენა, რომელიც PD-ს წევრია. ამის საწინააღმდეგოდ ხუთი ვარსკვლავის მოძრაობა აცხადებდა, რომ აღნიშნული ნაბიჯი შრომით ექსპლუატაციას დააკანონებს და არ შეამცირებს მას.

ამასთან, ყოფილ პრემიერმინისტრს და ხუთი ვარსკვლავის მოძრაობის ლიდერს, მატეო სალვინის მიაჩნდა, რომ მათ ხელი უნდა შეეწყოთ იტალიელებისთვისა და რეგულარული მიგრანტებისთვის, რომლებიც სამსახურის ძიებაში არიან.