დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელმა, ხათუნა ზახაშვილმა განმარტა, რატომ არის ავტომობილის მძღოლის გვერდით ჯდომა აკრძალული მძღოლის ოჯახის წევრისთვისაც.

მისი თქმით, ეს საერთაშორისო რეკომენდაციაა, რომელიც ბევრ ქვეყანაში არსებობს და არაფერი არ დაშავდება თუ გადაადგილების დროს სხვა მგზავრები უკანა სავარძელზე ისხდებიან.

"რეკომენდებულია, რომ მძღოლი იჯდეს დამოუკიდებლად, ცალკე და მძღოლთან იყოს ჩაწეული მცირედ ფანჯარა, რაც უზრუნველყოფს იმ ტერიტორიის მაღალ აერაციას, ჰაერის გადაადგილებას წინიდან უკან და ცირკულაციის ხარისხის გაუმჯობესებას ავტომობილში. რაც შეეხება ოჯახის წევრის მძღოლის გვერდით დაჯდომის აკრძალვას იმიტომ, რომ სხვა სივრცეში ისინი ერთად არიან და რა განსხვავებაა ავტომობილსა და არაავტომობილში ყოფნასთან დაკავშირებით, ბატონებო და ქალბატონებო, როგორ წარმოგიდგენიათ, როგორ უნდა ამოწმო მანქანაში მძღოლის გვერდით ზის მძღოლის ოჯახის წევრი თუ სხვა ადამიანი? მოდით, ყველამ დავიცვათ წესები, არაფერი არ დაშავდება თუ გადაადგილების დროს სხვა მგზავრები ისხდებიან უკანა სავარძელზე. მერწმუნეთ, რისკები ასე უფრო შემცირებულია", — განაცხადა ზახაშვილმა.