დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ჯანდაცვის მინისტრის, ეკატერინე ტიკარაძის თქმით, ვანის, ქობულეთისა და სამეგრელოს რეგიონებში ამ ეტაპზე ზომების გამკაცრება არ იგეგმება. მინისტრმა მთავრობის ბრიფინგზე აღნიშნა, რომ ამ თემაზე შესაძლოა მთავრობა დღეს საღამოს კიდევ ერთხელ შეიკრიბოს.

"დღეის მდგომარეობით საბჭომ იმსჯელა და ბოლნისის მოდელის განხილვა ამ რეგიონებში არ განიხილება, თუმცა აქ მიმდინარე მოვლენები არის საყურადღებო. ამ ეტაპისთვის მიმდინარეობს დეტალური და ინტენსიური გამოძიება, კონტაქტების მოკვლევა. შეიძლება დღეს საღამოს ჩვენ კიდევ ერთხელ შევიკრიბოთ და მივიღოთ გადაწყვეტილება შემდგომ გამკაცრებაზე", — თქვა ეკატერინე ტიკარაძემ.

მინისტრის თქმით, ამ დროისთვის ვანში ინტენსიური თერმოსკრინინგი მიმდინარეობს და 5 000 მოქალაქეა გამოკვლეული, მთავრობა მსჯელობს დამატებით ღონისძიებებზე, რომლებსაც მომავალში გაატარებენ.

დღეს, 8 აპრილს მთავრობის სხდომაზე ცნობილი გახდა, რომ ვანის მუნიციპალიტეტის გასასვლელებში სპეციალური გამშვები პუნქტები მოეწყობა. ირაკლი ჩიქოვანის განმარტებით, გამშვები პუნქტების მოწყობა კორონავირუსით ინფიცირების კონკრეტულ შემთხვევას უკავშირდება. მისი თქმით, მიმდინარეობს ამ შემთხვევის შესწავლა და გარკვეული კონტაქტები დადგენილია.

ბოლო მონაცემებით, საქართველოში კორონავირუსით ინფიცირების 12 ახალი შემთხვევაა და ჯამში ინფიცირებულია 208 ადამიანი. აქედან გარდაცვლილია 3, ხოლო გამოჯანმრთელებულია 48. კარანტინის რეჟიმში 4 682 პირი რჩება, ხოლო, სტაციონარში მეთვალყურეობის ქვეშ 375 პაციენტია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: