ოსკაროსანმა მსახიობმა მეთიუ მაკკონაჰიმ კარანტინის დროს ტეხასის შტატში ერთ-ერთი მოხუცებულთა სახლის წევრები მოულოდნელად გაახარა, ონლაინ დაუკავშირდა და მათთან ერთად ბინგო ითამაშა.

CBS-ის ცნობით, ამ დაწესებულების მობინადრეებს ჯერ კიდევ გასულ სექტემბერს სურდათ მეთიუ მაკკონჰისთან შეხვედრა და მართალია დაგვიანებით, თუმცა მათ სურვილი მაინც აუსრულდათ და Zoom-ის საშუალებით მსახიობთან ერთად კვირა საღამო ხალისიანად გაატარეს.

მეთიუ მაკკონაჰისა და მოხუცებულთა სახლის მობინადრეების თამაშს თვალს მსახიობის ოჯახის წევრები — დედა, ცოლი და შვილები ადევნებდნენ.

აღსანიშნავია, რომ თამაშში თითოეულ გამარჯვებულს შესაძლებლობა ეძლეოდა პრიზის სახით ოსკაროსანი მსახიობისთვის ერთი კითხვა დაესვა. ამან მაკკონაჰიცა და იზოლაციაში მყოფი მოხუცებიც ძალიან გაახალისა.

"ამით მათ ნამდვილი ოცნება აუხდათ. ამ კრიზისულ პერიოდში მათ საოცრად ისიამოვნეს მეთიუსა და მისი ოჯახის ხილვით, მათთან საუბრით", — განაცხადა მოხუცებულთა სახლის წარმომადგენელმა, მოლი დევისმა.

მეთიუ მაკკონაჰი პანდემიის დროს აქტიურადაა ჩართული კრიზისის დაძლევაში. მან გასულ კვირას ტვიტერზე გაავრცელა ვიდეო, სადაც ყველას მოუწოდებს გავერთიანდეთ ამ მძიმე ჟამს "სახის, რასისა და სქესის არმქონე" მტრის წინააღმდეგ.