ევროპული საქართველოს ლიდერი გიგა ბოკერია აცხადებს, რომ ხელისუფლებას ბუნდოვანი პასუხები აქვს საზღვარგარეთ მყოფი მოქალაქეების დროულად ვერდაბრუნებაზე, ამიტომ აძლევს მათ რჩევებს, როგორ მოაგვარონ არსებული პრობლემა და მოუწოდებს, რომ უცხოეთში დარჩენილ მოქალაქეებს კომპენსაცია გადაუხადონ.

კერძოდ, მთავრობის განმარტება, თითქოს მოქალაქეების დაბრუნება ფრენების სირთულის გამო ვერ ხდება, ბოკერიასთვის არარელევანტურია. მისი თქმით, ფრენები ყველგან შეჩერებულია და ნებისმიერი ავიაკომპანიისთვის მარტივი იქნება მსგავსი შეკვეთის აღება. მისივე თქმით, რეალური პრობლემა ის არის, რომ არ არის საკმარისი საკარანტინე ადგილები ჩამოყვანისთანავე ამ ხალხის გადასაყვანად. ამის მოსაგვარებლად კი ბოკერია სთავაზობს ხელისუფლებას დაუკავშირდნენ იმ სასტუმროებს, რომლებიც ტურისტული ნაკადების შეწყვეტის გამო ცარიელია.

ბოკერიას თქმით, თუ სახელმწიფო ერთ კვირაში ვერ ჩამოიყვანს იმ მოქალაქეებს, რომლებმაც უკვე დააფიქსირეს დაბრუნების სურვილი საკონსულოებში, მაშინ მათ უნდა გადაუხადოს კომპენსაცია ადგილსამყოფელ ქვეყანაში არსებული მინიმალური ხელფასის შესაბამისი ოდენობით. კერძოდ, თუ მოქალაქეები შეყოვნდებიან ერთი კვირით, უნდა გადაუხადონ მინიმალური ხელფასის 1/4. ამავდროულად, მისი თქმით, ეს თანხა კვირის განმავლობაში არ უნდა იყოს 600 ევროზე ნაკლები.

ბოკერიას განცხადებით, თუ მოქალაქეები მომავალშიც გამოთქვამენ დარეგისტრირების სურვილს და სახელმწიფო 10 დღეში ვერ უზრუნველყოფს მათ ჩამოყვანას, მაშინ კომპენსაციის იგივე წესი უნდა გავრცელდეს.

"კომპენსაციის გადახდა არის საქართველოს სახელმწიფოს ვალდებულება, იმისთვის, რომ ჩვენმა მოქალაქეებმა მოახერხონ ადგილმსაყოფელ ქვეყნებში მინიმალურ პირობებში თავის შენახვა და ეკონომიკურ გამოწვევებთან გამკლავება", — განაცხადა ბოკერიამ.

მოქალაქეების ქვეყანაში დაბრუნების საკითხი ბოლო რამდენიმე დღეა ოპოზიციისა და ხელისუფლების კამათის საგანი გახდა. კერძოდ, ნაციონალურმა მოძრაობამ განაცხადა, რომ შეუძლია საქართველოს მოქალაქეების დასაბრუნებლად ავიარეისები უზრუნველყოს, რაზეც პასუხად უარი მიიღო.

გიორგი გახარიამ აღნიშნა, რომ ევროპის სხვადასხვა ქალაქიდან საქართველოს მოქალაქეების ჩამოყვანაში ქვეყანას დახმარება არ სჭირდება და თუ ვინმეს შესაძლებლობა აქვს, ფული ფონდში ჩარიცხოს. მისი თქმით, ამ თემაზე რამდენიმე კვირაა მხოლოდ ჭორაობენ.

ექსპრეზიდენტმა მიხეილ სააკაშვილმა გახარიას პასუხად განაცხდა, რომ, რომ ფონდში ფული შეუძლია "ბუნკერში ჩამალულმა უფროსმა" ბიძინა ივანიშვილმა გადაურიცხოს. სააკაშვილის თქმით, მთავრობისგან მხოლოდ 2 რამეს ითხოვენ, რომ მიმართონ საელჩოებს წერილით, რათა გაიხსნას აეროპორტები და შემდეგ ამ რეისმა თბილისში დაჯდომა მოახერხოს.

ნაციონალური მოძრაობის თავმჯდომარემ, გრიგოლ ვაშაძემ განაცხადა, რომ უკრაინული ავიაკომპანია მზად არის 6, 7, 8 და 9 აპრილს თბილისისკენ რეისები შეასრულოს და სთხოვა ხელისუფლებას, რომ ნებართვა მისცენ. თუმცა, პასუხად ისევ ფულის ფონდში ჩარიცხვა მიიღო, ამჯერად, საგარეო საქმეთა მინისტრისგან.