თბილისის მერიასა და ევროპის რეკონსტრუქციისა და განვითარების ბანკს (EBRD) შორის თბილისის ავტობუსების პროექტის მხარდაჭერის ხელშეკრულებას ხელი მოეწერა. მემორანდუმის თანახმად, EBRD მერიას ავტობუსების შესაძენად 27 მილიონ ევროს გამოუყოფს.

თბილისის მერიის ინფორმაციით, პროექტის ფარგლებში, გათვალისწინებულია თბილისისთვის ახალი, ეკოლოგიურად სუფთა, გაზზე მომუშავე 150 ავტობუსის შეძენა. ავტობუსები იქნება ადაპტირებული შეზღუდული შესაძლებლობის მქონე პირთათვის და ექნება სპეციალური პანდუსები.

მემორანდუმს ხელი თბილისის ვიცე-მერმა ლაშა აბაშიძემ, ევროპის რეკონსტრუქციისა და განვითარების ბანკის ბანკირმა თეა მელიქაძემ, ასევე თბილისის სატრანსპორტო კომპანიის გენერალურმა დირექტორმა, ნუგზარ ჭეიშვილმა მოაწერეს.

გარდა ამისა, თბილისის მერია მიიღებს გრანტს, 7 მილიონი ევროს ოდენობით, რომელიც გამოყოფილი იქნება აღმოსავლეთ ევროპის ენერგო-ეფექტურობისა და გარემოს დაცვის პარტნიორობის (E5P) მიერ. (E5P) მრავალდონორიანი ფონდია, რომელსაც EBRD მართავს.

მერიის პრესსამსახურის ინფორმაციით, თბილისის მერიამ გამოაცხადა საერთაშორისო ტენდერი საკონსულტაციო კომპანიის მოსაძიებლად, რომელიც დედაქალაქს საზოგადოებრივი ტრანსპორტის ახალ სამარშრუტო სქემასა და უფრო მოსახერხებელ ელექტრონული გადახდის სისტემას შესთავაზებს. შესყიდვის პროცედურები ხორციელდება ევროპის რეკონსტრუქციისა და განვითარების ბანკის რეგულაციების შესაბამისად. როგორც მერია აცხადებს, შესყიდვის მიზანია მგზავრზე ორიენტირებული საზოგადოებრივი ტრანსპორტის სისტემის განვითარება, რომელიც წარმატებით გაუმკლავდება მობილობის პრობლემას. პროექტის ღირებულებაა 800 ათასი ევროა, საიდანაც 300 ათასს თბილისის მთავრობა ბიუჯეტიდან დააფინანსებს, ხოლო 500 ათას ევროს საერთაშორისო ორგანიზაციიდან გრანტის სახით მიიღებს.