სახალხო დამცველმა უზენაესი სასამართლოს მოსამართლეობის კანდიდატების შერჩევის პროცესის შესაჩერებლად საკონსტიტუციო სასამართლოს მიმართა. ნინო ლომჯარია იმ ნორმატიული აქტების შეჩერებას ითხოვს, რომლებიც განსაზღვრავენ უზენაესი სასამართლოს მოსამართლეთა შერჩევას.

ომბუდსმენის განმარტებით, ამის მიზეზი ის გახდა, რომ 2019 წლის 1 ნოემბერს კონსტიტუციური სარჩელით მიმართა სასამართლოს და იუსტიციის უმაღლესი საბჭოს მიერ უზენაესის მოსამართლედ ასარჩევად პარლამენტისათვის წარსადგენი კანდიდატების შერჩევის წესის არაკონსტიტუციურად ცნობა მოითხოვა, რაც ამავე წლის 17 დეკემბერს საკონსტიტუციომ არსებითი განხილვისთვის დაარეგისტირა. თუმცა, მისი განცხადებით, 2020 წლის 17 მარტს იუსტიციის საბჭოს განკარგულებით, უზენაესის 2 მოსამართლის თანამდებობაზე კანდიდატთა შერჩევის პროცედურა დაიწყო.

ომბუდსმენი მიიჩნევს, რომ კანონმდებლობა შეიცავს კანდიდატების შერჩევის პროცესის თვითნებურად წარმართვისა და მონაწილე კანდიდატთა კონსტიტუციური უფლების შეუქცევადი დარღვევის მაღალ საფრთხეს, ამიტომაც სადავო ნორმატიული აქტის შეჩერება სურს.

იუსტიციის უმაღლესმა საბჭომ 20-კაციანი სია 4 სექტემბერს დაამტკიცა. სიაში აღმოჩნდა ის ხუთი "სადავო" მოსამართლე, რომელიც პარლამენტში დეკემბერში წარდგენილ 10-კაციან სიაში იყო, მათ შორის, გიორგი მიქაუტაძე, ნინო ქადაგიძე, პაატა სილაგაძე, მერაბ გაბინაშვილი, თამარ ალანია.