ქართულმა ოცნებამ დღეს გამართულ პოლიტიკური საბჭოს სხდომაზე გადაწყვიტა, რომ მეცხრე მოწვევის პარლამენტის თავმჯდომარის პოსტზე ირაკლი კობახიძეს წარადგენს. ის 2015 წლიდან ამავე პარტიის აღმასრულებელი მდივანია.

განათლება

38 წლის ირაკლი კობახიძე პროფესიით იურისტია. ქართული ოცნების ინფორმაციით, მან იურიდიული განათლების მიღება თბილისის ივანე ჯავახიშვილის სახელობის სახელმწიფო უნივერსიტეტში 1995 წელს დაიწყო. 2002–2005 წლებში გერმანიაში, დიუსელდორფის უნივერსიტეტში სამართლის მაგისტრის კვალიფიკაცია მიიღო, ხოლო 2006 წელს ამავე უნივერსიტეტის დოქტორის ხარისხი.

სამუშაო გამოცდილება აკადემიური მიმართულებით

ირაკლი კობახიძე 2005–დან 2012 წლამდე თბილისის სახელმწიფო უნივერსიტეტის იურიდიული ფაკულტეტის ასისტენტ-პროფესორად მუშაობდა, 2009–2010 წლებში კი ამავე სასწავლებლის იურიდიული ფაკულტეტის ხარისხის უზრუნველყოფის სამსახურის უფროსის მოვალეობის შემსრულებელად.

საქართველოს პარლამენტის მომავალი თავმჯდომარე წლების განმავლობაში თანამშრომლობდა სხვა სასწავლებლებთანაც. 2007–2008 წლებში ის იყო თ. წერეთლის სახელმწიფოს და სამართლის ინსტიტუტი უფროსი მეცნიერ-თანამშრომელი, 2011– 2013 წლებში კი საქართველოს უნივერსიტეტი მოწვეული ლექტორი.

ირაკლი კობახიძე 2011–2014 წლებში ასევე ასწავლიდა კავკასიის უნივერსიტეტის კავკასიის სამართლის სკოლაში როგორც ასოცირებული პროფესორი.

ქართული ოცნების ინფორმაციით, ის თსუ–ს 2014 წლის აგვისტოში დაუბრუნდა როგორც ასოცირებული პროფესორი და ამ დრომდე იქ მუშაობს.

სამუშაო გამოცდილება საერთაშორისო ორგანიზაციებში

ირაკლი კობახიძის პირველი სამსახური საერთაშორისო ორგანიზაციაში დაიწყო 2000 წელს. ის 200–2001 წლებში იყო USAID/Overseas Strategic Consulting Ltd–ის საზოგადოებრივი განათლების პროექტის კოორდინატორი შიდა ქართლის რეგიონში.

2006–2008 წლებში ის მუშაობდა ექსპერტად ადგილობრივი თვითმმართველობის საკითხებში გაეროს განვითარების პროგრამის (UNDP) ფარგლებში. კობახიძე გაეროს განვითარების სხვადასხვა პროგრამაში იყო დასაქმებული მენეჯერულ პოზიციაზე 2014 წლის ჩათვლით. 2011–2012 წლებში ის ასევე იყო ევროპის საბჭოს წარმომადგენლობის ექსპერტი სტრატეგიული დაგეგმვის საკითხებში.

კობახიძე 2011–2012 წლებში ფონდ ღია საზოგადოება - საქართველოს ადამიანის უფლებებისა და კანონის უზენაესობის პროგრამის ექსპერტთა კომიტეტის წევრიც იყო.

პოლიტიკური კარიერა

ირაკლი კობახიძემ პოლიტიკური კარიერია ქართულ ოცნებაში დაიწყო. მას აქ 2015 წლის იანვრიდან უკავია აღმასრულებელი მდივნის პოზიცია, ასევე არის პოლიტიკური საბჭოს წევრი.