ვიდეოში, რომელიც Facebook-ზე მომხმარებელმა გიორგი კაკაშვილმა ატვირთა, გოგი დოლიძის (ყოფილი გოგოლის) და კლდიაშვილის კუთხეში მანქანების მოძრაობის უკვე ტრადიციად ქცეული სქემაა აღბეჭდილი.

ქუჩის კუთხეში დამაგრებულია სამი საგზაო ნიშანი, აქედან ორი მძღოლებს მიანიშნებს, რომ მხოლოდ მარჯვნივ შეხვევაა ნებადართული. თუმცა, როგორც ჩანს, ვერც პირველმა და ვერც მეორე ნიშანმა თბილისელი მძღოლები ვერ დაარწმუნა, რომ მარცხნივ არ მოეხვიათ. შესაბამის სამსახურს მესამე ნიშნის დამატება მოუწია, რომელიც მძღოლებს კიდევ ერთხელ, წითლად ამცნობს, რომ მარცხნივ შეხვევა არ შეიძლება.

სამგზის მინიშნების მიუხედავად, მძღოლები მაინც არღვევენ მოძრაობის წესს და არ გადაადგილდებიან საგზაო ნიშნებით მითითებული მიმართულებით.

როგორც მომხმარებლები ვიდეოს კომენტარებში წერენ, აღნიშნულ ადგილას ხშირად აჯარიმებენ მძღოლებს, მაგრამ, როგორც ჩანს, ეს სასჯელი პრევენციისთვის საკმარისი არ არის.