დღეს, 4 ნოემბერს, BP Georgia-ს სათაო ოფისთან მოქალაქეები შეიკრიბნენ. თბილისის სოლიდარობის ქსელის ორგანიზებული აქციის მონაწილეები სოფელ ზვარეში მომხდარ ინციდენტს აპროტესტებენ.ისინი მოითხოვენ, რომ დადგეს ადგილობრივი მენეჯმენტის პასუხისმგებლობის საკითხი და შინაგან საქმეთა სამინისტრომ მიანიჭოს ინციდენტს შესაბამისი კვალიფიკაცია.

აქციის მონაწილეებს უჭირავთ ბანერები წარწერით: "მშრომელთა სიცოცხლე საფრთხეშია", "საქართველოს რკინიგზა პასუხისმგებელია".

ორგანიზატორების განცხადებით, რკინიგზის ადმინისტრაცია სასწრაფოდ უნდა ჩაერთოს პროცესში და აიღოს შესაბამისი პასუხიმგებლობა მის ქვეკონტრაქტორ კომპანიაზე.

მოქალაქეები აპირებენ მოაწყონ მსვლელობა და გადაინაცვლონ საქართველოს რკინიგზის ოფისთან.

აქციის მონაწილეები ითხოვენ, რომ დაუყონებლივ გადაიხედოს სახელმწიფოს მიერ შრომის პოლიტიკა და დაჩქარდეს ქმედითი შრომის ინსპექციის შექმნა.

3 ნოემბერს, ხარაგაულის რაიონის სოფელ ზვარეში, რკინიგზის ლიანდაგის მშენებლობაზე დასაქმებული რამდენიმე მუშა კომპანია ჩინეთის რკინიგზის 23-ე ბიუროს წარმომადგენლებმა სცემეს. თავდაპირველად, შინაგან საქმეთა სამინისტრომ On.ge-ს განუცხადა, რომ აღნიშნულ ფაქტთან დაკავშირებით გამოძიება სისხლის სამართლის კოდექსის 125-ე მუხლით დაიწყო, რაც ცემას გულისხმობს. 3 ნოემბერს, დღის ბოლოს, სხეულის განზრახ ნაკლებად მძიმე დაზიანების ბრალდებით, ჩინეთის სახალხო რესპუბლიკის სამი მოქალაქე დააკავეს.