მმართველი პარტიის ქართული ოცნების ლიდერმა კახა კალაძემ, რუსთავი 2-ზე, გადაცემა არჩევანში საპარლამენტო არჩევნების დროს მომხდარი ინციდენტების შესახებ ისაუბრა. მისი თქმით, შინაგან საქმეთა სამინისტროს არჩევნებზე მომხდარი ძალადობრივი ფაქტები რეაგირების გარეშე არ დაუტოვებია:

"ყველა ფაქტი, სადაც რაიმე გადაცდომა იყო, ან ხელისუფლების წარმომადგენლის ან ოპოზიციის მხრიდან, შესაბამისად მოხდა რეაგირება და გარწმუნებთ, რომ თუ არსებობს რაიმე დანაშაული, ჩვენ აუცილებლად მივყვებით ბოლომდე. ყველა ვინც კანონს არღვევდა, აუცილებლად აგებს პასუხს. რაც შეეხება კონკრეტულ ფაქტებს, მაგალითად როდესაც ზუგდიდში ერთ-ერთი საარჩევნო უბანი დაარბიეს, შესაბამისად, შსს-მ მოახდინა რეაგირება, დააკავეს კონკრეტული პირი და მიმდინარეობს გამოძიება. გავიხსენოთ მარნეული, როდესაც ოპოზიციური პარტიის მაჟორიტარი დეპუტატობის კანდიდატი ცდილობდა იქ არეულობა შემოეტანა, ცდილობდა კონკრეტული უბნის ჩაშლას თავისი მხარდამჭერებით, როდესაც მივიდნენ და ქვები დაუშინეს. ამ ფაქტის შემდეგ ექვსი პირი დააკავეს და აქაც შსს-მ მოახდინა შესაბამისი რეაგირება".

კალაძე შედარებისთვის აშშ-ს საპრეზიდენტო არჩევნების კამპანიას იხსენებს და ამბობს, რომ ძალადობრივი ფაქტები იქაც ხშირია:

"შედარებასაც თუ გავაკეთებთ დავაკვირდეთ რა ხდება ამერიკაში, როგორ მიმდინარეობს საარჩენო კამპანია, ყოველდღე ცხვირ-პირს ამტვრევენ ერთამანეთს, ამიტომ თუ რაიმე გადაცდენა იყო, რეაგირების გარეშე არ დარჩენილა არაფერი".