სახალხო დამცველი მიიჩნევს, რომ ბიოლოგიის მე-8 კლასის სახელმძღვანელოში წამალდამოკიდებულ ადამიანებთან მიმართებით გამოყენებული სიტყვა ნარკომანი მცდარი ტერმინია. ამასთან, ომბუდსმენი განმარტავს, რომ ამავე წიგნში წამალდამოკიდებული ადამიანი აღქმულია როგორც საზოგადოებისთვის საშიში პიროვნება:

"სახელმძღვანელოში ასევე ერთმანეთთან არის გაიგივებული აივ ინფექცია და შიდსი და მცდარი ინფორმაციაა მიწოდებული მათი გავრცელებისა და აღნიშნულ დაავადებებთან ბრძოლის შესახებ. სახელმძღვანელოში ასევე ასახულია შიდსით დაავადებული წამალდამოკიდებული პირის შემზარავი ფოტო".

სახალხო დამცველის ინფორმაციით, 2016 წლის 30 აპრილს აღნიშნულთან დაკავშირებით ომბუდსმენმა მოუწოდა განათლების სამინისტროს, ბიოლოგიის სახელმძღვანელოდან წამალდამოკიდებული, აივ ინფექციისა და შიდსის მქონე ადამიანების მიმართ სტიგმისა და სტერეოტიპების შემცველი ფრაზები და მსჯელობები ამოეღოთ.

ომბუდსმენის განმარტებით, წიგნში გამოყენებული ფრაზები, მსჯელობა და მცდარი ინფორმაცია ხელს უწყობს წამალდამოკიდებული, აივ ინფექციის და შიდსის მქონე ადამიანების მიმართ სტერეოტიპული დამოკიდებულებისა და სტიგმის გაძლიერებას, ახალისებს სხვადასხვა სფეროში მათი უფლებების შეზღუდვას დისკრიმინაციული მოტივით:

"დაუშვებელია სკოლის მოსწავლეებისთვის განკუთვნილ სახელმძღვანელოში გვხვდებოდეს ისეთი გამონათქვამები, რომელიც არასწორ ინფორმაციას აწვდის ბავშვს და კონკრეტულ საკითხზე უქმნის მას ისეთ წარმოდგენას, რამაც შეიძლება წაახალისოს კონკრეტული ჯგუფების მარგინალიზაცია და ხელი შეუწყოს სტერეოტიპული აზროვნების განვითარებას სკოლის ასაკიდანვე".