ქუთაისში ოპოზიციის აქციაზე ქალი ყვავილებით მივიდა. როგორც ის ამბობს, ყვავილები მისი "იარაღია", იმ აგრესიული პირების წინააღმდეგ, რომლებიც აქციის მონაწელეებს სხვადასხვა ნივთებს ესვრიან.

"ისინი რომ ცოცხებს გვესვრიან და ვითომ გვამცირებენ, მე ჩემი ეზოს ქრიზანთემები უნდა ვესროლო", — განაცხადა აქციის მონაწილე ქალმა ფორმულას ეთერში.

ოპოზიციის დროებითი გაერთიანების ლიდერები მხარდამჭერებთან ერთად ქუთაისში საპროტესტო აქცია-მსვლელობას მართავენ. "ერთად ერთის წინააღმდეგ" — ამ ბანერით მათ მსვლელობა კიკვიძის ბაღიდან დაიწყეს და აღმაშენებლის ქუჩაზე, მერიასთან გადაინაცვლეს, სადაც აქცია მოწოდებების ფონზე გრძელდება. პარალელურად, ქართული ოცნების მხარდამჭერები მცირე კონტრაქციებს მართავდნენ. იყო რამდენიმე შემთხვევა, როდესაც აგრესიული პირები, რომლებსაც სახე ჰქონდათ დაფარული ოპოზიციის აქტივისტებთან დაპირისპირებას ცდილობდნენ და მათ სხვადასხვა ნივთებს ესროდნენ. გარდა ამისა, უცხო პირებმა სახურავებიდან აქციის მონაწილეებს კვერცხები ესროლეს.