ჩილეში საპროტესტო აქციების შემდეგ პრეზიდენტმა მთავრობა დაითხოვა. დემონსტრანტები ახალ მინისტრთა კაბინეტსა და სოციალურ რეფორმებს ითხოვდნენ. 25 ოქტომბერს სოციალური სამართლიანობის მოთხოვნით დედაქალაქის, სანტიაგოს ქუჩებში მილიონზე მეტი ადამიანი გავიდა.

"ჩვენ ახალ რეალობაში ვართ. ჩილე განსხვავებულია იმისგან, რაც ერთი კვირის წინ იყო", — განაცხადა პრეზიდენტმა სებასტიან პინიერამ.

გარდა ამისა, პრეზიდენტმა განაცხადა, რომ კომენდანტის საათი, რომელიც რამდენიმე ქალაქში აქციების გამო შემოიღეს, გაუქმდებოდა. ოპოზიცია კი ისევ მოუწოდებს ხელისუფლებას საგანგებო მდგომარეობა გააუქმოს.

აქციების დაწყებიდან 17 ადამიანი დაიღუპა და ასამდე დაშავდა. პარასკევის მარში მას შემდეგ მოეწყო, რაც მთელი კვირის განმავლობაში მოქალაქეებს პოლიციასთან შეტაკება უწევდა.

მოქალაქეების პროტესტი მეტროში მგზავრობის საფასურის გაზრდას მოჰყვა. თუმცა დროთა განმავლობაში მათი მოთხოვნები უფრო იზრდებოდა.