საერთაშორისო გამჭვირვალობა-საქართველოს ინფორმაციით, კულტურის მინისტრის, მიხეილ გიორგაძის პირველი მოადგილე, კახი კანდელაკი იმ კომისიის თავმჯდომარის მოადგილეა, რომელიც მისი მამის კომპანიის, Eastern Promotion-ის დაფინანსებასთან დაკავშირებულ საკითხებს განიხილავს და მათზე გადაწყვეტილებას იღებს. კულტურის სამინისტროში ინტერესთა შეუთავსებლობისა და კორუფციის რისკებთან დაკავშირებული კვლევის შედეგები TI-მ დღეს, 6 მაისს, გაასაჯაროვა.

ორგანიზაციის ინფორმაციით:

დავით მენაბდე კულტურის სამინისტროს სსიპ კულტურის განვითარების საინვესტიციო ფონდის დირექტორია და ასევე, 2014 წლის 21 აგვისტოდან 2016 წლის 17 თებერვლამდე სამინისტროს კულტურის სფეროს მდგრადობის უზრუნველყოფის საკითხების განმხილველი მუდმივმოქმედი კომისიის წევრიც იყო:

"ის ფონდსა და კომისიაში საქმიანობის პერიოდში პარალელურად ისტერნ პრომოუშენისა (45%) და ინთერნეშენალ ივენთის (47.5%) წილებს ფლობდა და გარკვეული დროით ამ უკანასკნელის გენერალური დირექტორიც იყო. ისთერნ პრომოუშენს რეგულარულად, უკონკურსოდ, აფინანსებდა სამინისტრო. ამ გადაწყვეტილებას კი კომისია იღებდა, რომლის წევრიც თავად დავით მენაბდეც იყო".

ისთერნ პრომოუშენისა და ინთერნეიშენელ ივენთის თანამშრომელთა ნაწილი კულტურის სამინისტროს სსიპ კულტურის განვითარების საინვესტიციო ფონდში პარალელურად არიან დასაქმებულები.

ორგანიზაცია ასევე საუბრობს იმაზეც, რომ კულტურის სამინისტროს ერთ-ერთი ყველაზე მნიშვნელოვანი პრიორიტეტი ჯაზ ფესტივალების მოწყობაა, რაც მის წლიურ ბიუჯეტში პირდაპირ არის მითითებული. TI-ის ინფორმაციით, სამინისტროს მტკიცებით, ჯაზ ფესტივალზე დანახარჯები გამართლებულია ფესტივალის პერიოდში ტურისტების რაოდენობის ზრდის გამო, თუმცა, ტურისტების რაოდენობის ზრდის ანალიზი სამინისტროში არ მიმდინარეობს:

"ეს მონაცემი განსაკუთრებით საინტერესოა, იმ პირობებში, როდესაც, მაგალითად, შავი ზღვის ჯაზ ფესტივალისთვის სამინისტროს ბიუჯეტში გამოყოფილი თანხა (600 000 ლარი) კულტურული ღონისძიებების ხელშეწყობის ქვეპროგრამისთვის გათვალისწინებული ხარჯების (1 808 500 ლარი) მესამედს (33%) შეადგენს; თბილისის ჯაზ ფესტივალისთვის გათვალისწინებული სახსრები კი (400 000 ლარი) საერთაშორისო ფესტივალების და ღონისძიებების ხელშეწყობისთვის გამოყოფილი დაფინანსების (1 670 000 ლარი) მეოთხედია (24%)".

TI-ის ცნობით:

2015 წელს კულტურის სამინისტრომ თბილისისა და შავი ზღვის ჯაზ-ფესტივალების ორგანიზების ფარგლებში ისთერნ პრომოუშენი (რომლის მეწილეები მინისტრის მოადგილის ოჯახის წევრი და ყოფილი ბიზნეს პარტნიორები იყვნენ) დაახლოებით 1 მილიონი ლარით უკონკურსოდ დააფინანსა:

"ჯაზ-ფესტივალების დაფინანსებაში სახელმწიფოს წილი დაუსაბუთებლად მაღალია. 2014 წელს შავი ზღვის ჯაზ-ფესტივალის 1 029 164 ლარის ოდენობის ბიუჯეტის დაახლოებით 62,7% სახელმწიფო დაფინანსებაზე მოდიოდა, 33,7 % თავად ისთერნ პრომოუშენი მიერ გაწეული ხარჯები იყო, 3,6% კი კერძო დამფინანსებლებიდან (სპონსორები/მხარდამჭერები) მოზიდული".

2015 წელს შავი ზღვის ჯაზ ფესტივალის მთლიანი ბიუჯეტი 1 634 539 ლარი იყო, რაც პროექტის წინა წლის ბიუჯეტთან შედარებით 605 375 ლარით (59%-ით) მეტი დაჯდა:

"კულტურის სამინისტროს ინფორმაციით, უწყებამ 2015 წელს ამ ხარჯის 36,9 % გაიღო, თუმცა ვინაიდან უწყებამ უფრო დეტალური ინფორმაცია არ მოგვაწოდა, რთულია დაფინანსების სხვა წყაროებისა და მათი პროცენტული წილის განსაზღვრა".

2015 წელს კულტურის სამინისტროს მიერ მუსიკალურ ღონისძიებებზე გაცემული თანხების (4 762 767 ლარი) 29% მიხეილ გიორგაძესთან, კახი კანდელაკთან და დავით მენაბდესთან დაკავშირებულ კომპანიებზე მოდის.

კულტურის მინისტრ მიხეილ გიორგაძესთან და მის მოადგილეებთან დაკავშირებული 10 კომპანია ფუნქციონირებს, რომლებიც კულტურის სფეროში საქმიანობენ, რეგულარულად იღებენ შეკვეთებს/დაფინანსებას სახელმწიფოსგან, მათ შორის, კულტურის სამინისტროდან ან მის დაქვემდებარებაში მყოფი სსიპ-ებიდან.

გიორგაძესთან და სამინისტროს სხვა მაღალი თანამდებობის პირებთან პირდაპირ ან ირიბად დაკავშირებული კომპანიები ხშირ შემთხვევაში სახელმწიფო დაწესებულებებიდან შემოსავლებს/დაფინანსებას კონკურსის ან ტენდერის გვერდის ავლით იღებენ.

ყოველივე ზემოთქმულის გათვალისწინებით, ორგანიზაციამ კულტურის სამინისტროსთვის გარკვეული რეკომენდაციები გასცა, რომელთა შესრულებაც ინტერესთა შეუთავსებლობისა და კორუფციის რისკების თავიდან აცილებისათვის არის საჭირო.