ფორმულას საინფორმაციო სამსახურის უფროსმა, გიორგი ლაფერაშვილმა ორსაათიანი გამოკითხვის შემდეგ პროკურატურა დატოვა. ლაფერაშვილის თქმით, გაუთქმელობას მოაწერა ხელი და დეტალებზე ვერ ისაუბრებს.

"სამწუხაროდ, მე ამ თემაზე ლაპარაკისგან შემზღუდა პროკურატურამ. ერთი განცხადება, რაც შემიძლია გავაკეთო, გავიდა დაახლოებით თვე-ნახევარი პაატა სალიას ბრიფინგიდან, გავიდა ორ თვეზე მეტი ამ საქმის გამოძიებიდან და პროკურატურას დაჭირდა ტელეკომპანია ფორმულას დირექტორის და საინფორმაციო სამსახურის უფროსის გამოკითხვა მაშინ, როცა ფორმულა გავიდა ეთერში. ბუნებრივია, ჩვენ არ ვეძებთ ბნელ ოთახში შავ კატას, მხოლოდ იმ შემთხვევაში, როცა კატა იქ არის, ვამბობთ, რომ არის. დამიჯერეთ ის ოთახი შავი კატებითაა სავსე", — განაცხადა მან.

ამბობს, რომ იმ დროს, როცა პროკურატურაში გამოკითხვაზე დაიბარეს, წესით საეთეროში უნდა იჯდეს და ეთერში გასასვლელად უნდა ემზადებოდეს. ამის შესახებ მან პროკურატურაში შესვლამდე განაცხადა.

დღეს, 3 ოქტომბერს ცნობილი გახდა, რომ პროკურატურაში გიორგი ლაფერაშვილთან ერთად ნაციონალური მოძრაობის წევრი, ზაალ უდუამაშვილი დაიბარეს. ორივე მათგანი რუსთავი 2-ს საქმეზეა დაბარებული.

გუშინ, 2 ოქტომბერს თითქმის 9 საათის განმავლობაში იყო გამოკითხვაზე ფორმულას დირექტორი, ზუკა გუმბარიძე. ამავე საქმეზე ბრალი წაუყენეს მთავარი არხის დამფუძნებელსა და რუსთავი 2-ის ყოფილ გენერალურ დირექტორს, ნიკა გვარამიას.

საგამოძიებო უწყების ინფორმაციით, 2015 წლის საანგარიშო პერიოდში რუსთავი 2-ის მიერ მიღებულმა დეკლარირებულმა ზარალმა 7 377 230 ლარი შეადგინა, ამავე პერიოდში ინტერ მედია პლიუსის დეკლარირებულმა მოგებამ კი 8 690 664 ლარი.