TV პირველის მფლობელი და დირექტორი, ვატო წერეთელი ამბობს, რომ თიბისი ბანკიდან ფულის გათეთრების საქმის ფარგლებში მისი არხის თითქმის ყველა თანამშრომელს უსმენდნენ. Facebook-ზე წერეთელმა ეს მას შემდეგ დაწერა, რაც მისი არხის ეთერში თიბისის დამფუძნებლების ადვოკატმა, ზვიად კორძაძემ TV პირველის მფლობელის მიყურადების შესახებ ინფორმაცია გაავრცელა.

"თურმე, ტელევიზიის მფლობელს უსმენდით ექვსი თვე ფარულად. ახლა გასაგებია, ამ, ვითომ ფულის გათეთრების საქმით, რამდენი რამის გაპრავება სცადეთ. ანუ უსმენდით ჩემსა და ინგა გრიგოლიას, ნინო ჟიჟილაშვილს, დიანა ტრაპაიძეს, ვახო სანაიას, გიორგი ისაკაძეს და თამარ ჩიხლაძეს [შორის] საუბრებს.

თიბისის საქმეზე გამოძიების მიმდინარეობის შესახებ ცნობილი 8 იანვარს გახდა. მაშინ პროკურატურამ დაადასტურა, რომ თიბისი ბანკიდან დოკუმენტები ამოიღო. პროკურატურამ განმარტავდა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში დამფუძნებლები და ამავდროულად, სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ. საგამოძიებო უწყების ინფორმაციით, ამ საქმეში ფიგურირებს შპს სამგორი თრეიდი და შპს სამგორი M, რომლებმაც თიბისი ბანკიდან მიიღეს სესხი და მის დამფუძნებლებს ასესხეს. სწორედ ამ კომპანიების წილები ეკუთვნის ვატო წერეთელს.