"არავის ეგონოს, რომ რამე გამაჩერებს", — ამის შესახებ ჟურნალისტებს თიბისი ბანკის დამფუძნებელმა, მამუკა ხაზარაძემ პროკურატურაში შესვლამდე განუცხადა.

ხაზარაძის თქმით, სახელმწიფო მანქანა მათ წინააღმდეგ მუშაობს და ეს ყველაფერი, რაც ხდება, არის ანაკლიის პროექტის გასაჩერებლად მიმართული.

"თქვენ იცით, რომ ანალოგიური შემოტევა იყო იანვარში. ჩვენ 6 თვე ამ შემოტევამ მოგვაყენა სერიოზული ზიანი, როგორც ბანკის აქციონერებს, ასევე ანაკლიის პროექტს მოლაპარაკებებს. 6 თვე დასჭირდა ამ პროცესის დასტაბილურებას, ინვესტორების უკან შემოტრიალებას, ჩვენ ხელახლა არჩევას ლონდონში აქციონერთა კრებაზე და აი, სწორედ გუშინ ავირჩიეთ სამშენებლო კომპანია. საეჭვოდ დაემთხვა ერთ-ერთი მინისტრის განცხადება, რომ პროგრესი არ არის დღეს ვიღებთ ამ განცხადებას ისევ ტელევიზიით, ისევ მსოფლიოს გასაგონად, იმისთვის, რომ ზიანი მიაყენონ ხაზარაძეს კი არა, საქართველოს ფინანსურ ინტერესებს, აქციონერებს და ანაკლიის პროექტს", — თქვა ხაზარაძემ.

მისივე განცხადებით, თუ ვინმეს ჰგონია, რომ ანაკლიის პორტი მამუკა ხაზარაძის პროექტია, ძალიან ცდება.

"ეს არის ჩვენი შვილების, შვილიშვილების პროექტი, საქართველოს აბსოლუტურად ახალი გზა, ეს არის გარღვევა როგორც ეკონომიკურად, ისე ორიენტაციის თვალსაზრისით. ეს არის ევროპისკენ გადადგმული მნიშვნელოვანი ნაბიჯი და ამის წინააღმდეგ არის ეს ყველაფერი [რაც ახლა მიმდინარეობს]" — აღნიშნა ხაზარაძემ.

მისი თქმით, გამოკითხვაზე იმდენჯერ მივა, რამდენჯერაც დაიბარებენ, რადგან კანონმორჩილი მოქალაქეა.

"არავის ეგონოს, რომ რამე გამაჩერებს, ვართ მართალი, როგორც 12 წლის წინანდელ საქმეში, ისე გუშინწინდელში და ყველა ბოლოდროინდელ საქმეში. ყველას მინდა ვუთხრა, დაწყნარდით, ჩვენ გავაგრძელებთ მოძრაობას იმიტომ, რომ ეს საქართველო არის ჩვენი და ეს ქვეყანა უნდა გახდეს ძლიერი, თავისუფალი, ევროპული ორიენტაციის", — დასძინა ხაზარაძემ.

თიბისი ბანკის დამფუძნებლებს, მამუკა ხაზარაძესა და ბადრი ჯაფარიძეს პროკურატურამ ფულის გათეთრების საქმეზე ბრალი წარუდგინა. ისინი დღეს, 24 ივლისს დაიბარეს პროკურატურაში ბრალდების დადგენილების წარდგენის მიზნით. პროკურატურა მიმართავს სასამართლოს აღმკვეთი ღონისძიების შეფარდების თაობაზეც. ჯერჯერობით უცნობია, აღმკვეთი ღონისძიების რა ფორმას მოითხოვს პროკურატურა.

"გამოტანილია დადგენილება მამუკა ხაზარაძისა და ბადრი ჯაფარიძის ბრალდების შესახებ, მათ მიერ, ჯგუფურად, 16 754 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება", — განაცხადეს საქართველოს პროკურატურაში გამართულ ბრიფინგზე.

გამოძიება სისხლის სამართლის კოდექსის 194-ე მუხლის მეორე ნაწილის "ა" და მესამე ნაწილის "გ" ქვეპუნქტით მიმდინარეობს. ეს მუხლი გულისხმობს ფულის გათეთრებას ჯგუფურად, რასაც თან ახლდა განსაკუთრებით დიდი ოდენობით შემოსავლის მიღება.