პრემიერმინისტრი, გიორგი კვირიკაშვილი ენმ-ს პასუხობს და განმარტავს, რომ მმართველი ძალა აქციის გამართვას და ქუჩების გადაკეტვით საზოგადოებისთვის დისკომფორტის შექმნას არ აპირებს:

"ჩვენ ვართ მმართველი ძალა, ხელისუფლებაში ვართ და არ ვიცი, ვის უნდა მოვუწყოთ აქცია. ჩვენ, პრაქტიკულად მოგებული გვაქვს არჩევნები და არანაირ აქციას და, მით უმეტეს, დისკომფორტის შექმნას ჩვენი მოქალაქეებისთვის, რომ ქუჩები გადავკეტოთ და მოძრაობა ჩავკეტოთ, არ ვაპირებთ. ერთადერთი აქცია, რომელსაც ჩვენ ვგეგმავთ, ეს იქნება გამარჯვების აქცია 8 ოქტომბრის საღამოს, როდესაც ჩვენ გავიმარჯვებთ".

ენმ-ს წევრი, ნიკა მელია კი ამბობს, რომ მმართველი გუნდი აქციის ჩატარებას აპირებდა, თუმცა მათ გადაიფიქრეს:

"საჯარო მოსამსახურეები გაფრთხილებული იყვნენ ყველა სამინისტროში, გამგეობაში, რომ ისინი უნდა გასულიყვნენ აქციაზე, თუმცა მათ შეხვდათ ძალიან დიდი პროტესტი და ამ შიშით ქართულმა ოცნებამ გადაიფიქრა. სასაცილოა კვირიკაშვილის განცხადება, როდესაც ის ამბობს, ხელისუფლებაში ვართ და ვის მოვუწყოთ აქციაო".

ერთიანი ნაციონალური მოძრაობა 2 ოქტომბერს თავის მხარდამჭერებთან ერთად წინასაარჩევნო აქციის გამართვას გეგმავს. როგორც ისინი აცხადებენ, მათ ჰქონდათ ინფორმაცია, რომ ამავე დღეს ქართულ ოცნებასაც ჰქონდა აქცია დაგეგმილი.