საფინანსო კომპანია საქართველო და მისგან დაზარალებული მეანაბრეები გაერთიანდნენ და ტელეკომპანია რუსთავი 2-ის წინააღმდეგ სასამართლოს მიმართეს. ამის შესახებ ადვოკატმა, ალექსანდრე კობაიძემ კვირას პრესკლუბში განაცხადა.

მისი თქმით, გაერთიანებული მხარეები მიიჩნევენ, რომ კომპანია საქართველო რუსთავი 2-ის სიუჟეტის გამო გაკოტრდა და ამის გამო, მეანაბრეებს ზარალი 70 მილიონი ტელეკომპანიამ უნდა აუნაზღაუროს.

"კომპანიას ზიანი მიაყენა 2016 წლის სექტემბერ-ოქტომბერში გასულმა სიუჟეტმა, სადაც აღნიშნული იყო, რომ ეს კომპანია იყო ე.წ. ფინანსური პირამიდა. რეალობა არავის გაუჟღერებია. არ გაუჟღერებიათ, რომ ეროვნული ბანკის მეირ კომპანია აღიარებული კვალიფიციური საკრედიტო ინსტიტუტი იყო. არ გაუჟღერებიათ, რომ დავალიანება არ ჰქონიათ სახელმწიფო ინსტიტუტებთან და კერძო პირებთან", — ამბობს ადვოკატი.

მისივე თქმით, გაერთიანებული მხარეები მიიჩნევენ, რომ სიუჟეტმა კომპანიაზე უარყოფითი შედეგი მოახდინა. ის ამბობს, რომ კომპანიიდან თანხების გადინება მოხდა და იმის გამო, რომ ბიუჯეტი აღარ დარჩა, კომპანია გაკოტრდა. ადვოკატი აცხადებს, რომ ამ ყველაფრის შემდეგ სასამართლომ გამოიტანა განაჩენი და საქართველოს 70 მილიონი ლარი დაეკისრა.