საქართველოს მთავრობის უახლოეს სხდომაზე განიხილება და დამტკიცდება მასწავლებლების პროფესიული განვითარების სქემაში შესატანი ცვლილებები. ამის შესახებ ჟურნალისტებს საქართველოს განათლების, მეცნიერების, კულტურისა და სპორტის მინისტრის მოადგილემ ირინა აბულაძემ განუცხადა.

მისი თქმით, პროფესიული განვითარების მოქმედი სქემა 2019 წლის ბოლომდე შენარჩუნდება, თუმცა მასში ცვლილებები ეტაპობრივად შევა. მისივე განმარტებით, მთავრობა ცვლილებებს სამი მიმართულებით განახორციელებს.

პირველი ცვლილებით მასწავლებლების თვითშეფასების კითხვარი სავალდებულო აღარ იქნება.

"წესით, ამ თვითშეფასების კითხვარის მიზანი იყო ის, რომ მასწავლებელს თავისი სუსტი და ძლიერი მხარეები უნდა განესაზღვრა და თავისი საგაკვეთილო პროცესი დაეგეგმა. თვითშეფასების კითხვარს არავინ ამოწმებდა. ეს იყო მასწავლებლისთვის და სკოლისთვის, რომ პროგრესი ეჩვენებინა, თუმცა კვლევამ აჩვენა, რომ რაღაც ეტაპზე ერთი წლის შემდეგ ეს კითხვარი ფორმალობა გახდა", — განაცხადა მინისტრის მოადგილემ.

მეორე, რაც მოქმედ სქემაში შეიცვლება, არის ის, რომ მასწავლებელს მიღებული სტატუსი აღარ ჩამოერთმევა. მოქმედი სქემით, მასწავლებელმა სტატუსის შესანარჩუნებლად კრედიტების გარკვეული რაოდენობა უნდა დააგროვოს.

"როცა მასწავლებელი სტატუსს იღებს, ის ადასტურებს მეტ კომპეტენციას. როგორ შეიძლება კომპეტენცია გქონდეს და არ გქონდეს? ერთია გქონდეს კომპეტენცია და მეორეა, რას აკეთებ ამ კომპეტენციით", — განაცხადა ირინა აბულაძემ.

მესამე ცვლილებით კი პედაგოგებს პროფესიული განვითარების ტრენინგების მეშვეობით, არაუმეტეს 5 კრედიტის დაგროვების საშუალება ექნებათ. არსებული სქემით ეს შესაძლებლობა შეზღუდულია.

"ჩვენი მიზანი არის, რომ პრაქტიკოს მასწავლებლებს ხელი შევუწყოთ რაც შეიძლება მრავალმხრივი გზებით გადავიდნენ შემდეგ სტატუსზე. გამოცდა არის ერთი და არა ერთადერთი. 5-კრედიტიანი შეზღუდვა არ არის რელევანტური. ეს შეზღუდვა მოიხსნება ახალი დადგენილებით", — განმარტა მინისტრის მოადგილემ.

მან ასევე თქვა, რომ 8 000 მასწავლებელი ზაფხულში უფროსი მასწავლებლის სტატუსს მიიღებს, რაც იმას ნიშნავს, რომ სექტემბრიდან მათი დანამატიც 150 ლარით გაიზრდება.

მასწავლებლების პროფესიული განვითარების სქემა 2015 წელს დამტკიცდა. სქემის მიხედვით, სკოლას სამი ტიპის მასწავლებელი ჰყავს:

უფრო — მასწავლებელი, რომელიც აკმაყოფილებს პრაქტიკოსი მასწავლებლისათვის სქემით განსაზღვრულ მოთხოვნებს და სქემით დადგენილი წესით განაწილებულია სქემაში უფროს მასწავლებლად ან მიენიჭება უფროსი მასწავლებლის სტატუსი.

წამყვანი — მასწავლებელი, რომელიც აკმაყოფილებს უფროსი მასწავლებლისათვის სქემით განსაზღვრულ მოთხოვნებს და სქემით დადგენილი წესით განაწილებულია სქემაში წამყვან მასწავლებლად ან მიენიჭება წამყვანი მასწავლებლის სტატუსი.

მენტორი — მასწავლებელი, რომელიც აკმაყოფილებს წამყვანი მასწავლებლისათვის სქემით განსაზღვრულ მოთხოვნებს და სქემით დადგენილი წესით მიენიჭება მენტორის სტატუსი.

ამავე თემაზე: კომპენსაცია წასვლის საპირწონედ — რას სთავაზობს სამინისტრო "ჩაჭრილ" პენსიონერ მასწავლებლებს