ლაგოდეხის რაიონში მოსული უხვი ნალექის გამო რამდენიმე სოფელში სახლების პირველი სართული და სახნავ-სათესი ნაკვეთების ნაწილი დაიტბორა. სოფლებში ჩავიდნენ ლაგოდეხის მერი და საგანგებო სიტუაციების მართვის სამსახურის წარმომადგენელი.

საგანგებო სიტუაციების მართვის სამსახურის კახეთის მთავარი სამმართველოს უფროსის, გიორგი ჩარკვიანის ინფორმაციით, სულ შესულია 80-მდე შეტყობინება.

"სიტუაცია ამ დროისთვის დადებითია, კლებულობს მდინარეებში წყლის დონე. ასევე, ინტენსიური წვიმა აღარ მოდის კახეთის რეგიონში, რაც გვაძლევს იმის თქმის საშუალებას, რომ ველოდებით სიტუაციის კიდევ უფრო მკვეთრ გაუმჯობესებას", — განაცხადა მან რუსთავი 2-ის მიერ გავრცელებულ კომენტარში.

მერის, ჯონდო მდივნიშილის თქმით, სამი დღის განმავლობაში კოკისპირული წვიმის შედეგად მოსული უხვი ნალექის გამო სანიაღვრე არხებმა ვერ გაატარეს წყლის ნაკადი.

"შესაბამისად, საკარმიდამო ნაკვეთები, სასოფლო-სამეურნეო სავარგულები და საცხოვრებელი სახლის პირველი სართულები დაიტბორა ზოგიერთ სოფელში", — განაცხადა მან რუსთავი 2-ის მიერ გავრცელებულ კომენტარში.

მისივე თქმით, მთელი ღამის განმავლობაში მობილიზებული იყო ტექნიკა და შესაბამისი სამსახურები.