ბალენსიაგას ახალ ჩვენებამდე, დემნა გვასალია თავის ინსპირაციასა და უშნო მოდაზე WWD-სთან ინტერვიუში საუბრობს.

გვასალია სხვისი საკუთრების მითვისების თემასაც შეეხო. დიზაინერი თავს ამ საკითხში მსხვერპლად მოიაზრებს:

"ეს უდიდესი სამყაროა და რეალურად არავინ იცის, რა საიდან მოდის. დემნა არაა ის ადამიანი, ვინც ეს ყველაფერი წამოიწყო".

გვასალიას თავისი ბრენდი აქვს — ვეტმო და ამავდროულად, ბალენსიაგას კრეატიული დირექტორია. მას შემდეგ, რაც მისი ნამუშევრები ხან Ikea-ს ჩანთასა და ხან მაკდონალდსის ფრის ყუთებს შეადარეს, საკამათო თემად იქცა, თუ რა იყო დიზაინერის შთაგონების წყარო.

გვასალიას აკრიტიკებენ მაღალი ფასისა და არც ისე ძვირფასი სამოსის გამოც.

"გვასალია სამუშაო კლასის სამოსს ქმნის და მდიდარ მომხმარებელზე ყიდის", - წერს Business of Fashion.

თავად დიზაინერს თუ მოვუსმენთ, ის აცნობიერებს მისი შემოქმედების მსგავსებას სხვა პოპულარულ ნივთებთან თუ მოვლენებთან, თუმცა ამბობს, ეს პრაქტიკა მისი დამკვიდრებული არაა.

"მე აღმოვაჩინე მარსელ დიუჩამპი და აღმოვაჩინე ჩემ თავში დიზაინერი, რადგან მისი სტილი მეხმარება იმის გაგებაში, თუ როგორ ვმუშაობ თავად".

ის ასევე ხსნის წინა წლების უნიფორმებისა და სამოსების მსგავსებას მის უახლეს მოდასთან:

"მე მსურს რომ წარსული მოდა გასაგები და თანამედროვე გავხადო ჩემი თაობისთვის და იმ მომხმარებლისთვის, რომელსაც ვესაუბრები. რადგან ჩვენ ერთი ღირებულებით გავიზარდეთ, ერთი ინტერესებით. მე მათ ინტერნეტის პირველ თაობას ვუწოდებ".

გვასალია ამბობს, რომ მის შემოქმედებასაც იპარავენ, თუმცა არ ეთანხმება მისი ფეხსაცმლისთვის შერქმეულ "უშნოს" იარლიყს:

"ეს აბსოლუტურად პროპორციური სავარჯიშო ფეხსაცმელია და არანაირად არ ჯდება უშნო და ლამაზი დიზაინის ჩარჩოში. მე არ ვარ უშნო მოდის ნაწილი. სიმართლე რომ გითხრათ, უშნო რამეები არც არასდროს მხიბლავდა".

ფოტო: Balenciaga

ფოტო: Zara

ის ასევე ხსნის, რატო ქმნის დიდი ზომის ფეხსაცმელებს:

"ვიზუალურად პატარა ზომის ტერფი არ მომწონს. ამას გარდა, უამრავ კაცს არ მოსწონს, როცა პატარა ტერფი აქვს. დიდი ზომის ფეხსაცმელი უფრო სტაბილური და მასკულინურია. ასევე მჯერა, რომ როცა ახალ სილუეტს ქმნი, პროდუქტი წარმატებული ხდება".

ესპანეთში დაარსებული მოდის სახლის ახალი ჩვენება სამ მარტს, პარიზში გაიმართება.