ევროპული საქართველოს ლიდერი გიგი უგულავა თიბისი ბანკიდან მამუკა ხაზარაძის წასვლას ფეისბუქის საკუთარ გვერდზე აფასებს. უგულავას აზრით, მამუკა ხაზარაძემ სწორი გადაწყვეტილება მიიღო, რადგან "სხვა არჩევანი არც ჰქონდა".

"ფაქტია, ბანკს ვერ მოიყოლებდა ამ ბრძოლაში. კავკასიური ცარცის წრის სცენა გათამაშდა. ხაზარაძემ ბავშვს ხელს ვერ მოვაძრობო და ხელი გაუშვა. ალბათ ივანიშვილიც გაეშვება. მან მიაღწია იმას რაც უნდოდა. ამოგანგლა ხაზარაძე და ახლა თავი უნდა ამართლებინოს, რომ არაა აქლემი. პროკურატურის საქმე კი დამოკლეს მახვილივით ეკიდება სადმე კუთხეში. შედეგი: დაზარალდა ქვეყნის იმიჯი. გაღრმავდა ტოტალური უიმედობის და განუკითხაობის განცდა", წერს უგულავა.

დღეს, 21 თებერვალს ცნობილი გახდა, რომ თიბისი ბანკის სამეთვალყურეო საბჭოს თავმჯდომარე, მამუკა ხაზარაძე ბანკს ტოვებს. ამის შესახებ განცხადება მან ფეისბუქით გაავრცელა. ხაზარაძე წერს, რომ ბანკის სამეთვალყურეო საბჭომ ლონდონში, გადაწყვიტა, ეროვნულ ბანკთან სამართლებრივი დავა შეწყვიტოს. როგორც ხაზარაძე აცხადებს, თიბისი ბანკზე "შეტევის" შემდეგ საერთაშორისო აქციონერებმა თვეში 200 მილიონი დოლარის ზარალი მიიღეს.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

რამდენიმე დღის წინ გამართულ პრესკონფერენციაზე მამუკა ხაზარაძემ თქვა, რომ დაწყებული გამოძიება ანაკლიის პორტის მშენებლობას საფრთხის ქვეშ აყენებს.

ამავე თემაზე: