ევროპული საქართველოს დეპუტატმა, გიგა ბოკერიამ უმრავლესობის დეპუტატებს ჰკითხა, რატომ გაასაჯაროა პროკურატურამ ინფორმაცია მაინცდამაინც თიბისი ბანკის საქმეზე, როცა სხვა საზოგადოებისთვის მნიშვნელოვან საქმეებზე დეტალების გახმაურებაზე უარს ამბობს გამოძიების ინტერესებიდან გამომდინარე. მისი თქმით, ეს ხაზს უსვამს საქმეში პოლიტიკური ინტერესის არსებობას.

"მთელ მსოფლიოს რატომ მოსდეს, რომ ერთ-ერთ მსხვილ ეკონომიკურ მოთამაშეს თურმე 11 წლის წინანდელ ამბავს უქექავენ, სადაც ბოლომდე პოზიცია ჯერ არ იციან, გამოძიება გრძელდებაო. რატო გააკეთეს ეს, თუ აქ პოლიტიკური ინტერესი არ იყო?" — განაცხადა ბოკერიამ.

ბოკერიას თქმით, რადგან უმრავლესობაში აცხადებენ, რომ საქმემ პოლიტიკური სარჩული არ უნდა მიიღოს, მაშინ არც დეპუტატებმა უნდა გააკეთონ პოლიტიკური განცხადებები.

"ამიხსენით რომელ ხაზს აწვებით, არ ერევით, თუ ცუდ ხალხს ებრძვით. იმიტომ, რომ აქაც სურათი იყო ძალიან მკაფიო. ჯერ ბატონმა ივანიშვილმა გააკეთა განცხადებები, პირდაპირ მის სტილში, კონკრეტული დასახელებით სამიზნისა თიბისი ბანკის", — განაცხადა ბოკერიამ.

თიბისის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.