"რუსთავი 2-ში გასული სიუჟეტი გახლავთ მტკნარი სიცრუე, სრული აბსურდი", — ასე გამოეხმაურა პრემიერი მამუკა ბახტაძე შაბათის კურიერში გასულ სიუჟეტს, რომლის მიხედვითაც მან დედამისს სასამართლოში უჩივლა. ის სასმართლო დავას "ხელშეკრულებაში არსებული სამართლებრივი ხარვეზით" ხსნის.

დღეს, 10 დეკემბერს მან მთავრობის სხდომაზე თქვა, რომ მის ოჯახს ჰქონდა ვალი, რომელიც დღევანდელი მდგომარეობით გასტუმრებულია. იგივე დასტურდებოდა რუსთავი 2-ის სიუჟეტითაც. ტელეკომპანიამ იპოთეკარი ჩაწერა, რომელიც ამბობდა, რომ მამუკა ბახტაძის თანამდეობაზე დანიშვნის შემდეგ მას კუთვნილი 70 000 დოლარი დაუბრუნა.

კურიერის ინფორმაციით, მამუკა ბახტაძემ დედას უფლება მისცა, მისი სახლი იპოთეკით დაეტვირთა და სესხი აეღო. სიუჟეტში ნათქვამია, რომ მოქალაქე იამზე კალანადაძისა და კიდევ ერთი პირისგან მანანა ნატიაშვილმა, ჯამში, 120 ათასი დოლარი სამი თვით ისესხა, თვეში სარგებელი თანხის 4 პროცენტი ანუ 4 800 აშშ დოლარი უნდა გადაეხადა და ფული წლის ბოლოს უკან უნდა დაებრუნებინა.

რუსთავი 2-ის მიერ მოპოვებული ცნობებით, პრემიერის დედამ ფული უკან არ დააბრუნა, ამიტომ იპოთეკარებმა აღსრულების ბიუროს მიმართეს და 2012 წლის ზაფხულში მამუკა ბახტაძის ოჯახს მცხეთის სახლიდან ასახლებდნენ. სწორედ ამ დროს მამუკა ბახტაძემ დედას სასამართლოში უჩივლა იმ მოტივით, რომ დედამ სესხი ისე აიღო, რომ მან ამის შესახებ არ იცოდა.

მამუკა ბახტაძის ფინანსთა მინისტრად დანიშვნამდე რამდენიმე თვით ადრე, კერძო იპოთეკარს, იამზე კალანდაძეს დაურეკეს და უთხრეს, რომ სადავო თანხას უბრუნებდნენ.

"უკვე ჩაქნეულივით რომ მქონდა ხელი, არ ველოდი, თავისით გამოჩნდა. ყველა სასამართლომ ეგენი გაამართლა, მაგრამ მერე მისმა შვილმა გადამიხადა, მეორე ბიჭი ყავთ მაგათ", — ჰყვება იამზე კალანდაძე რუსთავი 2-თან სატელეფონო ინტერვიუში.

შესწორება: თავდაპირველ სათაურში ეწერა, რომ მამუკა ბახტაძე უარყოფს, რომ დედამისს სასამართლოში უჩივლა, რაც რამდენიმე წუთში გასწორდა.