არჩეული პრეზიდენტი, სალომე ზურაბიშვილი ოპოზიციის მოთხოვნებს პასუხობს და აცხადებს, რომ ულტიმატუმების დრო არ არის.

"ჯერ არ არის და არასოდეს არ არის ულტიმატუმების დრო. პირველ რიგში, დემოკრატია მოითხოვს, რომ აღიარებული იყოს არჩეული პრეზიდენტი, რომ ჩვენ გადავიდეთ ახალ რეჟიმზე, დაწყნარდეს ეს გარემო, პოლიტიკური გარემო დავაწყნაროთ და გადავიდეთ საქმიან რეჟიმზე", — განუცხადა ზურაბიშვილმა ჟურნალისტებს.

გაერთიანებული ოპოზიცია არჩევნების შედეგებს არ აღიარებს. გუშინ, 2 დეკემბერს ოპოზიციამ აქცია გამართა, სადაც განაცხადეს, რომ სალომე ზურაბიშვილი მათი პრეზიდენტი არ არის. ვაშაძემ აქციის მონაწილეებს მოთხოვნები წარუდგინა: ვადამდელი საპარლამენტო არჩევნები, საარჩევნო სისტემის ძირეული ცვლილება, საოლქო კომისიების გაუქმება და საჯარო მოხელეების საარჩევნო პროცესში ჩართულობის აკრძალვა. ოპოზიციამ ხელისუფლებას 16 დეკემბრამდე მისცა დრო.

ვაშაძემ ხელისუფლებას მოუწოდა, კრიზისის დასაძლევად, შექმნან სამუშაო ჯგუფი. მისივე თქმით, გაერთიანებული ოპოზიციაც იმავე რაოდენობის დელეგაციას შექმნის. წინააღმდეგ შემთხვევაში ოპოზიცია, 16 დეკემბერს, სალომე ზურაბიშვილის ინაუგურაციის დღეს, აქციის გამართვას გეგმავს.

ამავე თემაზე: